जळगाव : शहरातील जैनाबाद परिसरात केवळ पाचशे रुपये न दिल्याच्या कारणावरून एका तरुणावर धारदार शस्त्राने हल्ला करण्यात आला. या हल्ल्यात गंभीर जखमी झालेल्या तरुणाचा उपचारादरम्यान आज सोमवारी सकाळी मृत्यू झाला. याबाबत शनिपेठ पोलीस स्टेशनमध्ये खुनाचा गुन्हा दाखल करण्याची प्रक्रिया सुरू आहे.
मिळालेल्या माहितीनुसार, नितीन नाना काळे (वय ३५, रा. जैनाबाद, जळगाव) असे मृत तरुणाचे नाव आहे. तो आई-वडील, पत्नी, एक मुलगा तसेच भाऊ-बहीण यांच्यासह जळगाव शहरात राहत होता. काही महिन्यांपूर्वी त्याला गोवा येथे कटलरीच्या दुकानात नोकरी मिळाल्याने तो तेथे काम करून कुटुंबाचा उदरनिर्वाह करत होता. सुट्टीमुळे तो गेल्या चार दिवसांपासून जळगावमध्ये आला होता.
रविवारी (दि. २२ मार्च) दुपारी सुमारे ३ वाजेच्या सुमारास जैनाबाद परिसरात जात असताना संशयित आरोपी शाम तुकाराम सूर्यवंशी याने त्याच्याकडे पाचशे रुपये मागितले. मात्र पैसे नसल्याचे सांगून नकार दिल्याने आरोपीला राग आला. संतापाच्या भरात त्याने धारदार शस्त्राने नितीन काळे याच्यावर हल्ला केला.
या हल्ल्यात गंभीर जखमी झालेल्या नितीन काळे याला तातडीने शासकीय वैद्यकीय महाविद्यालय व रुग्णालयात दाखल करण्यात आले होते. मात्र उपचार सुरू असताना सोमवारी (दि. २३ मार्च) सकाळी सुमारे ६ वाजता त्याचा मृत्यू झाला. घटनेची माहिती मिळताच कुटुंबीयांनी एकच आक्रोश केला. किरकोळ कारणावरून झालेल्या या खुनामुळे जळगाव शहर पुन्हा एकदा हादरले असून पोलिसांकडून पुढील तपास सुरू आहे.
Discussion about this post