जळगाव : “ माझे शहर माझी जबाबदारी” या नागरिक उपक्रमाच्या स्मरणपत्रानुसार जळगाव महानगरपालिकेत स्वच्छता व्यवस्थेवर महत्त्वपूर्ण आढावा बैठक झाली. जळगाव महानगरपालिका आयुक्त ज्ञानेश्वर ढेरे यांच्या अध्यक्षतेखाली झालेल्या बैठकीत शहरातील स्वच्छतेच्या विविध समस्या व त्यावरील उपाययोजनांवर सविस्तर चर्चा करण्यात आली.
या बैठकीस जळगाव महानगरपालिका उपायुक्त निर्मला गायकवाड, जळगाव महानगरपालिका सहायक आयुक्त (आरोग्य) उदय पाटील, जळगाव महानगरपालिका शहर अभियंता योगेश बोरोले, BVG कंपनीचे वरिष्ठ अधिकारी, सर्व स्वच्छता निरीक्षक, अन्य मनपा अधिकारी तसेच “माझे शहर माझी जबाबदारी” उपक्रमाची टीम उपस्थित होती.
बैठकीत नागरिकांनी पूर्वी मांडलेल्या १० महत्त्वाच्या मुद्द्यांवर महानगरपालिकेने केलेल्या कारवाईचा आढावा सादर करण्यात आला. यामध्ये वाढते Garbage Vulnerable Points (GVPs), कचरा संकलनातील अनियमितता, ओला–सुका कचरा विभाजनाची अंमलबजावणी, बाजारपेठांची रात्रीची स्वच्छता, ठेलेवाले व हॉकर्ससाठी विशेष कचरा व्यवस्थापन तसेच सिंगल यूज प्लास्टिक बंदीची कठोर अंमलबजावणी या मुद्द्यांचा समावेश होता. समस्यांची मूळ कारणे, प्रत्यक्ष अडचणी आणि प्रभावी उपाययोजना यांवर विशेष भर देण्यात आला.
जळगाव महानगरपालिका आयुक्त ज्ञानेश्वर ढेरे यांनी स्वच्छता मोहिमेत सातत्य राखण्याचे निर्देश दिले. नागरिकांच्या तक्रारींवर तात्काळ प्रतिसाद, प्रभागनिहाय देखरेख मजबूत करणे आणि स्वच्छता दूतांच्या माध्यमातून जनजागृती वाढवण्यावर भर देण्यास सांगितले. प्रशासन व नागरिकांचे सहकार्य वाढल्यास स्वच्छता व्यवस्थेत लवकर सुधारणा होतील, असे त्यांनी नमूद केले.
“माझे शहर माझी जबाबदारी” टीमने महानगरपालिकेच्या प्राथमिक व प्रगत कारवाईचे स्वागत करत ही प्रक्रिया सातत्यपूर्ण व काटेकोरपणे राबवावी, अशी अपेक्षा व्यक्त केली. या बैठकीमुळे प्रशासन–नागरिक समन्वय वाढून जळगाव शहराच्या स्वच्छतेत सकारात्मक व दृश्यमान बदल होतील, असा विश्वास व्यक्त करण्यात आला.
Discussion about this post