जळगाव : जळगाव महापालिकेतील स्वीकृत सदस्यांच्या निवडीची प्रक्रिया आता निर्णायक टप्प्यात आली असून विविध राजकीय पक्षांनी आपापल्या उमेदवारांची नावे प्रशासनाकडे सादर केली आहेत. येत्या ३० मार्च रोजी होणाऱ्या विशेष सभेत या सदस्यांची अधिकृत घोषणा केली जाणार असल्याने महापालिकेच्या राजकारणात उत्सुकता वाढली आहे.
महापालिकेचे आयुक्त ज्ञानेश्वर ढेरे यांच्याकडे भारतीय जनता पक्ष, शिवसेना शिंदे गट तसेच शिवसेना (उद्धव बाळासाहेब ठाकरे) गटाने स्वीकृत सदस्यांसाठी संभाव्य उमेदवारांची यादी सादर केली आहे. त्यामुळे अंतिम निवडीपूर्वी राजकीय हालचालींना वेग आला आहे.
भाजपकडून डॉ. राधेश्याम चौधरी, रमेश मतानी, सुभाष शौचे आणि प्रदीप रोटे यांची नावे पुढे करण्यात आली आहेत. तर शिवसेना शिंदे गटाने हर्षल मावळे आणि नरेंद्र सोनवणे यांना उमेदवारी दिली आहे. दुसरीकडे शिवसेना (उद्धव बाळासाहेब ठाकरे) गटाकडून वेगवेगळ्या स्तरावरून प्रस्ताव सादर करण्यात आले आहेत. गटनेते इब्राहिम पटेल यांनी युगंधरा अमित साळुंखे यांचे नाव सुचविले असून, जिल्हाप्रमुख कुलभूषण पाटील यांनी शरद तायडे यांचा प्रस्ताव मांडला आहे. हा प्रस्ताव बाळासाहेब कंखरे, उमेश चौधरी यांनी आयुक्तांकडे सादर केला. त्यामुळे या गटात अंतिम निवडीबाबत चर्चेला उधाण आले आहे.
दरम्यान, प्राप्त झालेल्या प्रस्तावांची छाननी २७ मार्च रोजी आयुक्तांच्या दालनात केली जाणार आहे. छाननीनंतर पात्र उमेदवारांची अंतिम यादी निश्चित करून ती विशेष सभेसमोर ठेवली जाणार आहे. त्यामुळे ३० मार्च रोजी होणाऱ्या घोषणेकडे महापालिकेतील सत्तासमीकरणांवर परिणाम होण्याची शक्यता असल्याने सर्वांचे लक्ष लागले आहे.
Discussion about this post