जळगाव शहरात मनपा अतिक्रमण निर्मूलन पथकाने अतिक्रमणधारकांवर कारवाई करत शहरातील अनेक ठिकाणचे अतिक्रमण हटवले आहे. याच दरम्यान आज शुक्रवारी (२० फेब्रुवारी) पथकाने अत्याधुनिक नवीन जिल्हा न्यायालय उभारणीसाठी निश्चित केलेल्या शाहू नगर येथील ट्राफिक गार्डन परिसरातील सुमारे सात एकर जागेवरील अतिक्रमण हटवण्याची कारवाई केली. या दरम्यान आठ वाहने आणि इतर अतिक्रमित वस्तू जप्त करण्यात आल्या.
जिल्हा न्यायालयाची सध्याची जागा अपुरी पडल्यामुळे प्रशासनाने नवीन इमारतीसाठी हा परिसर निवडला होता. या जागेवर अनेक खाद्यपदार्थ विक्रेते, हातगाडी चालक आणि गॅरेज व्यवसायिकांनी अतिक्रमण करून व्यवसाय सुरू केला होता, ज्यामुळे न्यायालयाच्या कामकाजासाठी आवश्यक जागा अडथळ्यात आली होती.
संबंधित जागा जिल्हा न्यायालय प्रशासनाने आधीच अधिकृतपणे ताब्यात घेतली असून, येथे कोणतेही अतिक्रमण करू नये, अशा सूचना फलकाद्वारे दिल्या होत्या. तरीही काही हॉकर्स आणि व्यवसायिकांनी अतिक्रमण पुन्हा केले, त्यामुळे प्रशासनाने कठोर भूमिका घेतली.
शुक्रवारी मनपा अतिक्रमण निर्मूलन पथकाने अधीक्षक संजय ठाकूर यांच्या मार्गदर्शनाखाली सर्व अतिक्रमण हटवले. यावेळी काही अतिक्रमणधारकांनी विरोध केला, मात्र पोलीस बंदोबस्ताच्या मदतीने परिस्थिती नियंत्रणात ठेवण्यात आली. आगामी काळात या परिसरात अत्याधुनिक सुविधांनी सुसज्ज जिल्हा न्यायालयाची इमारत उभारली जाणार असून, त्यामुळे न्यायव्यवस्थेच्या कामकाजाला गती मिळण्याची अपेक्षा आहे.
Discussion about this post