जळगाव : शिरसाळा मारुती मंदिर येथे दर्शन घेऊन परत येत असताना मन्यारखेडा फाट्याजवळ झालेल्या अपघातात जळगावातील एका तरुणाचा जागीच मृत्यू झाला. तर सोबत असलेले दोन जण गंभीर जखमी झाले आहेत. जखमींना जळगावच्या जिल्हा रुग्णालयात दाखल करण्यात आले आहे.
जळगाव शहरातील कंजरवाडा येथील नेहाल राजेश माछरे (वय १८) असे अपघातात (Accident) मृत झालेल्या तरुणाचे नाव आहे. काम करून नेहाला हा शिक्षण घेत होता. त्याचे वडील राजेश माछरे हे हातमजुरी करून कुटुंबाचा उदरनिर्वाह करीत होते. दरम्यान त्याचा भाऊ अक्षय राजेश माछरे (वय २३) आणि त्याचे नंदुरबार येथून आलेली आते बहीण उन्नती रविचंद्र रमाईचेकर (वय १२) हे दोघेजण सोमवारी (२२ जानेवारी) बोदवड तालुक्यातील शिरसाळा मारुती मंदिर येथे दर्शनासाठी गेले होते.
सकाळी दर्शन घेतल्यानंतर माघारी परतत असताना मन्यारखेडा फाटाजवळ पुढील तरुणांच्या दुचाकीचा घसरून भीषण अपघात झाला. यावेळी स्थानिक नागरिकांनी व पोलिसांनी धाव घेत त्यांना शासकीय वैद्यकीय महाविद्यालय व रुग्णालयात उपचारासाठी दाखल केले. त्या ठिकाणी नेहाल माछरे यास वैद्यकीय अधिकारी डॉ. आदित्य साळुंखे यांनी मयत घोषित केले. या प्रकरणी मयत तरुणाच्या कुटुंबीयांनी शासकीय रुग्णालयात मोठा आक्रोश केला. नशिराबाद पोलीस स्टेशनला अकस्मात मृत्यूची नोंद करण्याचे काम सुरू होते.
Discussion about this post