जळगाव : जळगाव शहरासह जिल्ह्यात छोट्या मोठ्या कारणावरून वाद होताना दिसत असून यातच एका कार्यक्रमात नाचत असताना मित्रासोबत एका जणाचे सुरू असलेले भांडण सोडविण्यासाठी गेलेल्या तरुणाला तीन जणांनी मारहाण करीत डोक्यात धारदार वस्तू मारली.यात पवन सुधाकर बाविस्कर (२६, रा. आसोदा रोड) हा तरुण जखमी झाला, ही घटना टॉवर चौकाजवळ घडली. याप्रकरणी शहर पोलिस ठाण्यात तीन जणांविरुद्ध गुन्हा दाखल करण्यात आला आहे.
टॉवर चौक परिसरात एका कार्यक्रमात पवन बाविस्कर याचा मित्र विशाल अरुण सपकाळे हा नाचत असताना गोविंदा नामक तरुणाचे त्याच्याशी भांडण झाले. हे भांडण सोडविण्यासाठी पवन गेला व त्याने भांडण सोडविल्याचा राग आल्याने गोविंदासह तीन जणांनी शिवीगाळ करीत मारहाण केली. तसेच त्याच्या डोक्यात धारदार वस्तू मारल्याने रक्तस्त्राव होऊन दुखापत झाली.
शहर पोलिस ठाण्यात गुन्हा दाखल याप्रकरणी पवन बाविस्कर याने शहर पोलिस ठाण्यात फिर्याद दिली. त्यावरून गोविंदा, हितेश, सोन्या (पूर्ण नाव समजू शकले नाही) या तिघांविरुद्ध गुन्हा दाखल करण्यात आला आहे. पुढील तपास पोलिस नाईक सुधीर साळवे करीत आहेत.
