जळगाव : राज्यातील हवामानात सातत्यानं बदल होत आहे. कुठं उन्हाचा चटका जाणवत आहे, तर कुठं ढगाळ वातावरण आहे. याच दरम्यान हवामान विभागाच्या मुंबई वेधशाळेने उत्तर महाराष्ट्रात तूरळक पावसाची शक्यता वर्तविली आहे. त्या अनुषंगाने जळगावसह धुळे, नंदुरबार, नाशिक जिल्ह्यांना पावसाचा येलो अलर्ट जारी केला आहे.
हवामान विभागाच्या वेधशाळेने आज सकाळी नऊ वाजेच्या सुमारास ही सूचना प्रसारित केल्याचे इगतपुरी विभागीय संशोधन केंद्राने कळविले आहे. त्यानुसार उत्तर महाराष्ट्रातील अहमदनगर वगळता इतर जिल्ह्यात तुरळक पावसाचा अंदाज वर्तविण्यात आला आहे.
या दरम्यान, नाशिकसह जळगाव, धुळे, नंदुरबार जिल्ह्यांमध्ये तुरळक ठिकाणी विजांच्या कडकडाटासह 30-40 किमी प्रतितास वेगाने वादळी वारे आणि पावसाच्या हलक्या सरी पडण्याची शक्यता आहे.
यामुळे घराबाहेर पडताना नागरिकांनी खबरदारी घ्यावी, असे आवाहन आयएमडी मुंबई विभागाने केले आहे.
एकीकडे दिवसेंदिवस वाढत्या उन्हामुळे जीवाची लाही लाही झाली आहे. तर आज सकाळपासून ढगाळ वातावरण अनुभवयास मिळत आहे. तरीदेखील उन्हाचा तडाखा वाढू लागला आहे.
Discussion about this post