जळगाव । जळगाव शहरातील सुवर्ण बाजारपेठेत सलग तिसऱ्या दिवशी तेजी कायम राहिली असून आज सकाळी बाजार उघडताच सोने आणि चांदीच्या दरात पुन्हा वाढ नोंदवली गेली. काही दिवसांपूर्वी घसरण झाल्याने ग्राहकांना दिलासा मिळाला होता; मात्र आता दरांनी पुन्हा विक्रमी पातळी गाठण्याची चिन्हे दिसत आहेत.
सोन्याचे दर
बुधवारी ३०९ रुपयांची वाढ होऊन २४ कॅरेट सोन्याचा दर (३% जीएसटीसह) प्रति १० ग्रॅम १,५७,३८४ रुपयांवर पोहोचला होता. गुरुवारी आणखी २,४७२ रुपयांची उसळी घेत दर १,५९,८५६ रुपयांवर गेला. यानंतर आज शुक्रवारी सकाळी पुन्हा २०६ रुपयांची वाढ नोंदवली गेल्याने दर १,६०,०६२ रुपयांपर्यंत पोहोचले.
चांदीतही विक्रमी तेजी
चांदीच्या दरातही मोठी वाढ झाली आहे. बुधवारी २,०६० रुपयांची वाढ होऊन दर (३% जीएसटीसह) प्रति किलो २,५१,३२० रुपयांवर पोहोचले. गुरुवारी ५,१५० रुपयांची वाढ होत दर २,५६,४७० रुपयांवर गेले. शुक्रवारी सकाळी आणखी ३,०९० रुपयांची भर पडून चांदीचा दर २,५९,५६० रुपयांवर पोहोचला.
आंतरराष्ट्रीय पातळीवरील राजकीय व आर्थिक परिस्थितीमुळे सोन्याच्या किमतींमध्ये अस्थिरता कायम आहे. विशेषतः अमेरिका–इराण तणावामुळे गुंतवणूकदार सुरक्षित गुंतवणुकीकडे वळत आहेत. मजबूत अमेरिकी रोजगार आकडेवारीमुळे व्याजदर कपातीची शक्यता कमी असल्याचे संकेत असून त्याचा परिणामही बाजारावर होत आहे.
Discussion about this post