जळगाव | महिन्याभराहून अधिक काळ सुरू असलेल्या इराण आणि अमेरिका–इस्त्रायल संघर्षानंतर अखेर युद्धविरामाची घोषणा करण्यात आली आहे. अमेरिकेचे राष्ट्राध्यक्ष डोनाल्ड ट्रम्प यांनी दोन्ही देशांमध्ये 14 दिवसांच्या सशर्त शस्त्रसंधीची माहिती दिल्यानंतर जागतिक बाजारात दिलासादायक वातावरण निर्माण झाले आहे.
या घडामोडींचा थेट परिणाम जळगावच्या सराफा बाजारावर दिसून आला असून सोनं आणि चांदीच्या दरात पुन्हा मोठी उसळी पाहायला मिळाली आहे. बुधवारी सकाळी बाजार उघडताच सोन्याच्या दरात सुमारे 3 हजार रुपयांची वाढ नोंदवली गेली, तर चांदीच्या दरातही 10 हजार रुपयांची वाढ झाली आहे.
सध्या जळगाव बाजारात जीएसटीसह सोन्याचा दर सुमारे 1 लाख 56 हजार 45 रुपयांवर पोहोचला आहे, तर चांदीचा दर 2 लाख 54 हजार 410 रुपयांपर्यंत गेला आहे. या वाढीमुळे गुंतवणूकदार आणि ग्राहकांमध्ये पुन्हा हालचाल वाढली असून बाजारात खरेदी-विक्रीचे प्रमाण वाढण्याची शक्यता व्यक्त केली जात आहे.
सुवर्ण व्यावसायिकांच्या मते, जागतिक परिस्थिती अजूनही अनिश्चित असल्याने सोनं-चांदीच्या दरात पुढील काही दिवसांत आणखी चढ-उतार होऊ शकतात. त्यामुळे गुंतवणूक करताना ग्राहकांनी सावध भूमिका घेण्याचा सल्ला दिला जात आहे.
Discussion about this post