जळगाव : सोने आणि चांदी खरेदी करणाऱ्या ग्राहकांसाठी आनंदाची बातमी आहे. जळगाव शहरातील सुवर्ण बाजारपेठेत आज सोमवारी सोन्याचे दर जोरदार घसरले आहेत. सोबतच चांदीच्या दरातही मोठी घसरण झाली आहे. आज सोने दरात १७५१ रुपयाची तर चांदी दरात तब्बल १०,३०० रुपयांची घट झाली. यामुळे लग्नसराईसाठी दागिने खरेदी करणाऱ्या ग्राहकांना दिलासा मिळाला.
सुवर्ण व्यवसायातील तज्ज्ञांच्या मते, युद्धाच्या काळातही अमेरिकन डॉलर मजबूत राहिल्यामुळे सोन्याचे दर नियंत्रित झाले आहेत. गुंतवणूकदार शेअर बाजारातील तोटा भरून काढण्यासाठी किंवा सुरक्षित गुंतवणुकीसाठी सोन्यातून पैसे काढून अमेरिकन बाँडमध्ये गुंतवणूक करत आहेत, ज्यामुळे स्थानिक बाजारात मोठ्या प्रमाणात किंमत घसरण दिसून येत आहे.
जळगावच्या सुवर्ण बाजारात शुक्रवारी १० ग्रॅम सोन्याचे दर जीएसटीसह एक लाख ६३,८७३ रुपये होते; शनिवारी १४४२ रुपयांनी घटून एक लाख ६२,४३१ रुपये झाली. सोमवारी सकाळी आणखी १७५१ रुपयांची घसरण नोंदवली गेल्याने सोन्याचे दर एक लाख ६०,६८० रुपये प्रति १० ग्रॅम झाले.
चांदीच्या दरांमध्ये देखील चढ-उतार सुरू राहिले. शुक्रवारी चांदीच्या दरात तब्बल १०,३०० रुपयांची घट नोंदली गेली आणि दर २,७२,९५० रुपये प्रति किलो झाले. शनिवारी थोडी सुधारणा झाली, दर २,७३,९८० रुपये प्रति किलो पोहचले, मात्र सोमवारी सकाळी पुन्हा १०,३०० रुपयांची घट झाल्याने दर २,६३,६८० रुपये प्रति किलो झाले.
या चढ-उतारामुळे स्थानिक बाजारपेठेत ग्राहक आणि गुंतवणूकदारांमध्ये मोठा उत्साह आणि चर्चेची लाट निर्माण झाली आहे. विशेषज्ञांचे म्हणणे आहे की आंतरराष्ट्रीय राजकीय वातावरण, डॉलरची मजबुती आणि शेअर बाजारातील हालचाली यांचा सरळ परिणाम सोन्याच्या दरांवर होत आहे.
Discussion about this post