मुंबई । सध्याच्या घडीच्या ऑनलाईन फसवणुकीच्या घटना मोठ्या प्रमाणात वाढल्या आहेत. यातही मोबाईलद्वारे फ्रॉड होण्याचे प्रमाणदेखील वाढत आहे. त्यामुळे अनेकदा सामान्य नागरिकांचे नुकसानदेखील होते.आता फ्रॉड कॉलला आळा घालण्यासाठी रिझर्व्ह बँक ऑफ इंडियाने मोठा निर्णय घेतला आहे.
आरबीआयने बँकांना नवीन सूचना दिल्या आहेत. बँका आता ग्राहतकांना फोन करण्यासाठी विशेष नंबर वापरणार आहेत. व्यवहारासाठी ग्राहकांना कॉल करण्यासाठी फक्त ‘१६००’ फोन नंबर सिरीज वापरण्यास आरबीआयने बँकांना सांगितले आहे. जर बँका आणि इतर नियमन केलेल्या संस्था प्रमोशनल उद्देशाने ग्राहकांना कॉल किंवा एसएमएस करत असतील तर त्यांनी ‘१४०’ फोन नंबर सिरीज वापरावी.
आरबीआय आर्थिक फसवणूक रोखण्यासाठी नवीन नियम अंबलात आणत आहे. यामुळे आर्थिक फसवणुकीला आळा बसेल असा आरबीआयचा विश्वास आहे. याशिवाय, आरबीआयने बँका आणि इतर नियमन केलेल्या संस्थांना त्यांच्या ग्राहकांच्या डेटाबेसचे निरीक्षण करण्यास आणि अनावश्यक डेटा काढून टाकण्यास सांगितले आहे.
बँकांना जारी केलेल्या परिपत्रकात, आरबीआयने त्यांना योग्य पडताळणीनंतर नोंदणीकृत मोबाइल नंबर अपडेट करण्यास आणि रद्द केलेल्या मोबाइल नंबरशी जोडलेल्या खात्यांचे निरीक्षण वाढविण्यास सांगितले आहे जेणेकरून लिंक केलेली खाती फसवणूक होऊ नयेत.
आरबीआयने ३१ मार्च २०२५ पूर्वी सूचनांचे पालन करण्यास सांगितले आहे. डिजिटल व्यवहारांच्या प्रसारामुळे ग्राहकांना सुविधा मिळाल्या आहेत पण त्यामुळे फसवणुकीतही वाढ झाली आहे, असे आरबीआयने म्हटले आहे.आरबीआयने सर्व बँकांना सर्व विद्यमान आणि नवीन खाती आणि लॉकर्समध्ये नामांकित व्यक्तीची खात्री करण्यास सांगितले. मध्यवर्ती बँकेने म्हटले आहे की, मोठ्या संख्येने खात्यांना नामांकित व्यक्ती नाही. खातेधारकाच्या मृत्यूनंतर कुटुंबातील सदस्यांना होणारा त्रास कमी करणे आणि दाव्यांचे जलद निपटारा करणे हे उद्दिष्ट आहे.
Discussion about this post