जळगाव : मुलाचे लग्न असल्‍याने घरात सर्व तयारी झालेली होती. दहा दिवसांवर विवाह सोहळा असल्‍याने पत्रिका वाटपाची देखील लगबग अंतिम टप्‍प्‍यात होती. मात्र मुलाच्या लग्नाच्या पत्रिका वाटत असताना अचानक हृदयविकाराच्या तीव्र झटक्याने पित्याचा दुर्दैवी मृत्यू झाल्याची घटना एरंडोल येथे घडली. यामुळे अख्‍खे घर दुःखाच्‍या खाईत लोटले गेले.
जळगाव शहरातील जीवननगरात वास्‍तव्‍यास असलेले तथा ग. स. सोसायटीचे प्रशासन अधिकारी महेंद्र रामा मोरे (वय ५७) यांचा मोठा मुलगा विक्रांत याचे १ जूनला लग्न नियोजित होते. यामुळे ते मंगळवारी (२३ मे) सकाळी पत्रिका वाटण्यासाठी बाहेर पडले. चोपडा, अमळनेर, धरणगावमार्गे ते एरंडोल येथील ग. स. सोसायटीच्या कार्यालयात पत्रिका वाटण्यास तीन वाजेच्या सुमारास गेले होते. पत्रिकांवर नाव लिहिण्यासाठी खुर्चीवर बसले असताना अचानक त्यांना हृदयविकाराचा झटका आला. त्यांना जवळच्याच रुग्णालयात (Hospital) कर्मचाऱ्यांनी नेले. परंतु वैद्यकीय अधिकाऱ्यांनी जळगाव येथे नेण्यास सांगितले. जळगाव शासकीय रुग्णालयात आणले असता तेथे वैद्यकीय अधिकाऱ्यांनी मयत घोषित केले.
महेंद्र मोरे यांच्या नातेवाईकांनी शासकीय रुग्णालयात एकच आक्रोश केला. त्यांच्या पश्चात पत्नी शारदा, मोठा मुलगा विक्रांत, लहान मुलगा कुणाल असा परिवार आहे. विक्रांत पुण्यात कंपनीत तर लहान मुलगा एमबीएचे शिक्षण घेत आहे. याप्रकरणी पोलीस स्टेशनला अकस्मात मृत्यूची नोंद करण्याचे काम सुरु होते.
Discussion about this post