FASTag वापरणाऱ्यांनो लक्ष द्या ! १ फेब्रुवारीपासून हे नियम बदलतील, जाणून घ्या काय आहे?

मुंबई । जर तुम्ही फास्टॅग वापरत असाल, तर तुमच्यासाठी एक महत्वाची बातमी आहे. फास्टॅगचे नियम पुढील महिन्यात, १ फेब्रुवारी रोजी बदलणार आहेत. भारतीय राष्ट्रीय महामार्ग प्राधिकरणाने (NHAI) नवीन नियम लागू केले आहेत. १ फेब्रुवारीपासून जारी केलेल्या नवीन फास्टॅगवर कारसाठी नो युअर व्हेईकल (KYV) प्रक्रिया बंद केली जाईल. हा निर्णय कार, जीप आणि व्हॅनसाठी जारी केलेल्या नवीन फास्टॅगवर लागू होईल. चला तपशील जाणून घेऊया.

नव्या नियमांत काय बदल होणार आहेत?
नव्या नियमानुसार FASTag जारी करण्याची जबाबदारी पूर्णपणे बँकांवर असणार आहे. बँका FASTag देण्यापूर्वीच वाहनाची माहिती तपासतील. ही पडताळणी VAHAN डेटाबेसच्या माध्यमातून केली जाईल. VAHAN मध्ये माहिती उपलब्ध नसेल, तर वाहनाच्या नोंदणी प्रमाणपत्राच्या (RC) आधारे खात्री केली जाईल. एकदा FASTag अ‍ॅक्टिव्ह झाला की वेगळी KYV प्रक्रिया करावी लागणार नाही.

आतापर्यंत वाहनचालकांना कोणत्या अडचणी येत होत्या?
FASTag घेतल्यानंतर अनेकदा आरसी पुन्हा अपलोड करावी लागत होती, वाहनाचे फोटो पाठवावे लागत होते आणि टॅग पुन्हा वेरिफाय करावा लागत होता. या प्रक्रियेमुळे FASTag सुरू होण्यासाठी अनेक दिवस लागत होते. त्यामुळे टोल प्लाझावर वाद, दंड आणि वाहतूक कोंडीसारख्या समस्या निर्माण होत होत्या.

जुन्या FASTag यूजर्ससाठी काय?
आधीपासून FASTag वापरणाऱ्या वाहनचालकांसाठीही हा निर्णय दिलासादायक आहे. आता नियमितपणे KYV करावी लागणार नाही. फक्त टॅग चुकीच्या वाहनाशी जोडल्याची तक्रार, FASTag चा गैरवापर किंवा चुकीच्या पद्धतीने टॅग लावल्यासच तपासणी केली जाईल.

या बदलाचा फायदा कोणाला आणि कसा?
या निर्णयामुळे देशभरातील वाहनचालकांना FASTag जलद आणि सोप्या पद्धतीने मिळणार आहे. कागदपत्रांची झंझट कमी होईल, टोल प्लाझावर वेळ वाचेल आणि प्रवास अधिक सुलभ होईल. एकूणच FASTag प्रणाली अधिक कार्यक्षम आणि वाहनचालकांसाठी अनुकूल ठरणार आहे.