जळगाव । जळगाव जिल्ह्यातील भुसावळ शहरात तीन लाख रुपयांच्या नकली नोटा जप्त करण्यात आले असून तिघांना पोलिसांनी ताब्यात घेतलं आहे. नकली नोटा आढळून आल्याने जिल्ह्यात खळबळ उडाली आहे.
सय्यद मुशारद अली मुमताज अली (वय ३८, रा. दुश्मनीय पार्क शिवाजीनगर जळगाव), नदीम खान रहीम खान (वय ३,० रा. सुभाष चौक शनिवार पेठ जळगाव), अब्दुल हकीम अब्दुल कादर (वय ५७, अब्दुल अमित चौक रसलपुर रोड रावेर) अशी अटक करण्यात आलेल्या तिघांची नावे आहेत.
भुसावळ येथील बाजारपेठ पोलिस निरीक्षक राहुल वाघ यांना काहीजण भुसावळ शहरात बनावट नोटा विक्रीसाठी घेऊन येत आहेत, अशी गोपनीय माहिती मिळाली होती. यानंतर पोलीस निरीक्षक राहुल वाघ यांनी पथक तयार करून भुसावळ शहरात सापळा रचला. व बनावट नोटांसह बुधवारी तिघांना अटक केली.
संशयित एक लाखाच्या खर्या नोटांच्या बदल्यात तीन लाखांच्या बनावट नोटा देणार असल्याने पोलिसांनी पूर्ण तयारी केली होती. बुधवारी सायंकाळी संशयितांनी तीन ठिकाणे बदलल्यानंतर एका ठिकाणी त्यांनी व्यवहार पूर्ण केला. व्यवहार पूर्ण झाल्यावर दबा धरून बसलेल्या पोलीस पथकातील कर्मचाऱ्यांनी त्यांना ताब्यात घेतले. रात्री उशिरा स्टेट बँकेच्या अधिकार्यांकडून नोटांचे व्हेरिफिकेशन करण्यात आले.
Discussion about this post