नववी पास तरुणाचा कारनामा! यूट्यूबवर व्हिडिओ पाहून लाखोंच्या बनावट नोटा छापल्या, पण असा झाला भांडफोड..

मुंबई : एका नवीन पास असलेल्या २६ वर्षीय तरुणाने यूट्यूबवर नोटा छापण्यासंदर्भातील व्हिडिओ पाहिले. त्यानंतर स्वत:च बनावट नोटा बनविण्याचा कारखाना टाकला. लाखो रुपयांच्या नोटा त्या तरुणाने चलनात आणल्या आहे.मात्र शेवटी तो पोलिसांच्या जाळ्यात अडकला. नवी मुंबई पोलिसांनी त्याला तळोजा परिसरातून अटक केली आहे.प्रफुल्ल पाटील असे त्या तरुणाचे नाव आहे.

नवी मुंबईतील तळोजा परिसरात राहणाऱ्या प्रफुल्ल पाटील (२६) याचे शिक्षण केवळ नववीपर्यंत झाले आहे. तो बनावट नोटा छापत असल्याची माहिती पोलिसांना मिळाली. त्यानंतर गुन्हे शाखेच्या पथकाने सापळा रचत त्याला अटक केली. पोलिसांनी दिलेल्या माहितीनुसार प्रफुल्ल पाटील याने यूट्यूबवर व्हिडिओ बघून आणि माहिती घेत या नोटांची छपाई केली. संगणक व प्रिंटरचा वापर करत त्याने या नोटा छापल्या. प्रफुल्ल पाटील याच्याकडून आतापर्यंत 10,20,50,100 आणि 200 रुपयांचा एकूण 1443 बनावट नोटा हस्तगत केल्या.

असा उघड झाला प्रकार
प्रफुल्ल पाटील याने पोलिसांना सांगितले की, आर्थिक अडचणीत आल्यामुळे तो कुटुंबापासून अनेक दिवसांपासून वेगळा राहत होता. त्यामुळे त्या नोटा छापण्याचा प्रकार सुरु केला. त्याने काही नोटा वापरल्या आहे. त्याच्या नोटासंदर्भात एका दुकानदारास संशय आला. त्याने पोलिसांनी माहिती दिली आणि प्रफुल्ल पाटील याचा बनावट नोटांचा भांडाफोड झाला.