जळगाव । लोकसभा निवडणुकीआधी ज्येष्ठ नेते एकनाथ खडसेंनी शरद पवारांची साथ सोडत भाजपात घरवापसीचे संकेत दिले. केंद्रीय गृहमंत्री अमित शाह आणि भाजपचे राष्ट्रीय अध्यक्ष जे.पी.नड्डा यांच्यासोबतचे फोटोही त्यांनी सोशल मीडियावर टाकले. एवढंच नव्हे तर सून रक्षा खडसे यांचा लोकसभा निवडणुकीत प्रचारही केला. मात्र, अद्यापही खडसेंना भाजपने अधिकृत एन्ट्री दिलेली नाही.त्याचमुळे निराश झालेल्या एकनाथ खडसेंनी खळबळजनक विधान केलं आहे. त्यांनी भाजपमध्ये जे.पी.नड्डा यांच्यापेक्षा देवेंद्र फडणवीस आणि गिरीश महाजन हे दोन मोठे नेते आहेत अशी खोचक टीका केली आहे.
आमदार एकनाथ खडसे यांनी मीडियाशी संवाद साधला.यावेळी त्यांनी विविध मुद्द्यांवर रोखठोक भाष्य केलं. यात त्यांनी त्यांच्या रखडलेल्या भाजपप्रवेशावरही प्रतिक्रिया दिली.ते म्हणाले, काही अडचणींमुळे मी भाजपमध्ये जाण्याचा निर्णय घेतला होता. त्या अडचणी आजही कायम आहेत.भाजपाला गरज नसेल तर माझा मूळ पक्ष काय वाईट आहे,मी या ठिकाणी आमदार आहे,चार वर्ष आमदार राहणार आहे असंही विधान खडसे यांनी यावेळी केलं.
भाजपमध्ये जे.पी. नड्डा यांच्याहस्ते आपला प्रवेश झाला होता,तो त्यांनी जाहीर करायला पाहिजे होता.मात्र, गिरीश महाजन आणि देवेंद्र फडणवीस यांनी विरोध केल्याने तो जाहीर झाला नाही. याचा अर्थ जेपी नड्डा यांच्यापेक्षा भाजपमध्ये हे दोन्ही नेते मोठे आहे असे दिसते असा आरोपही आमदार खडसेंनी यावेळी केला.
माजी गृहमंत्री आणि राष्ट्रवादी काँग्रेस शरदचंद्र पवार पक्षाचे नेते अनिल देशमुख यांच्याविरोधात सीबीआयने गुन्हा दाखल केला आहे. यावरही एकनाथ खडसे बोलले. ते म्हणाले,अनिल देशमुख हे देवेंद्र फडणवीस यांच्याविरोधात उभं राहणार अशी चर्चा आहे.आपल्या विरोधी लोकांना राजकीय हेतूने संपविण्याचा हा प्रयत्न दिसतो आहे. अनिल देशमुख दबावाने काम करत असतील तर ते राजकीय व्यक्ती आहेत,
मात्र, अधिकाऱ्याने कोणत्याही दबावाला बळी न पडता काम करायला हवे होते,कोणीही दबाव आणला तरी नियमाने काम करणे हे अधिकाऱ्याचे काम होते,अनिल देशमुख यांच्या दबावाला बळी पडून काम करणारा अधिकारी दोषी आहे,राजकीय परिस्थिती बदलत आहे तसं प्रशासकीय वातावरण बदलत आहेत.
Discussion about this post