जळगाव । जळगावमधून एक मोठी बातमी समोर येत आहे, राष्ट्रवादी काँग्रेस (शरदचंद्र पवार) पक्षाचे नेते तथा विधानपरिषदेचे आमदार एकनाथ खडसे यांच्याविरोधात सावदा पोलीस ठाण्यात गुन्हा दाखल करण्यात आला आहे. पोलिसांसोबत केलेल्या अर्वाच्य शब्दात अरेरावी व गृहमंत्र्यांबाबत अपशब्द वापरल्याचा आरोप एकनाथ खडसेंवर पोलीस फिर्यादीत करण्यात आला आहे. या घटनेमुळे राजकीय वर्तुळात खळबळ उडाली आहे.
काय आहे प्रकरण नेमकं?
विशेष सावदा पोलीस ठाण्याचे सहाय्यक पोलीस निरीक्षक विशाल पाटील यांनी स्वतः एकनाथ खडसे यांच्याविरुद्ध तक्रार दिली आहे. विधानपरीषद सदस्य एकनाथराव गणपतराव खडसे रा. मुक्ताईनगर हे सावदा पोलीस स्टेशनच्या आवारामध्ये दाखल झाले, त्यानंतर त्यांनी तासखेडा ता. रावेर येथील गौणखनिज संदर्भात गुन्हा दाखल का केला नाही ? अशी आमच्याकडे विचारणा केली. त्यानंतर ते आम्हाला अत्यंत अपमानास्पद बोलले, तसेच आमच्यावर लाचलुचपत प्रतिबंधक विभागाचा ट्रॅप लावतो, अशी धमकी देखील त्यांनी यावेळी दिली, आम्हाला दमदाटी देखील केली, असं या तक्रारीमध्ये म्हटलं आहे. महाराष्ट्र शासनाचे मंत्री यांना अश्लील भाषेत मोठमोठ्याने शिवीगाळ केली, असा आरोप देखील यावेळी खडसेंविरोधात करण्यात आला आहे, या प्रकरणात आता खडसेंविरोधात गुन्हा दाखल करण्यात आला आहे.
एकनाथ खडसे यांची प्रतिक्रिया काय?
या घटनेवर एकनाथ खडसे यांची प्रतिक्रिया समोर आली आहे. शासनाच्या मुरुमाची मोठ्या प्रमाणात चोरी होते. “त्याबद्दल मी त्यांना अडीच महिने कशी चौकशी होते? असा प्रश्न विचारला. त्यावर ते म्हणाले, मला वाटेल तोपर्यंत मी चौकशी करेन. मला काय तुमचं बंधन आहे का? म्हणे त्या डिपार्टमेंटवाल्यांनी पैसे खाल्ले. मग मी म्हटलं, त्यांनी पैसे खाल्ले मग तू काय * खाल्ला? तुला काम दिलं आहे ना? मग नंतर मी लगेच दोन मिनिटात सांगितलं की, माझा चुकीचा शब्द गेला. मी तुझी माफी मागतो. आता शेवटचा शब्द आहे, तुम्ही जे हफ्ते घेतात त्या प्रकरणाची लाचलुचपत प्रतिबंधक विभागाकडे जावं लागेल आणि नवी कारवाई करावी लागेल”, अशी भूमिका एकनाथ खडसे यांनी या घटनेवर दिली आहे.
Discussion about this post