आज सरकारविरोधातील अविश्वास प्रस्तावावर चर्चा ; प्रस्तावावरील चर्चेदरम्यान कोणत्या पक्षाला किती मिनिटांचा वेळ मिळणार?

नवी दिल्ली । लोकसभेत आज दुपारी १२ वाजल्यापासून विरोधकांच्या अविश्वास ठरावावरील चर्चेला सुरुवात होणार आहे. सरकारच्या वतीने भाजप खासदार निशिकांत दुबे आणि विरोधकांच्या वतीने काँग्रेस नेते राहुल गांधी चर्चा सुरू करू शकतात. राहुल गांधी यांचे संसदीय सदस्यत्व कालच बहाल करण्यात आले आहे. अविश्वास प्रस्तावावर चर्चा करण्यापूर्वी संसदेच्या ग्रंथालय भवनात भाजप संसदीय पक्षाची बैठक झाली, त्यात पुढील रणनीती ठरविण्यात आली.

यावर पंतप्रधान मोदी गुरुवारी उत्तर देतील
अविश्वास प्रस्तावावरील राहुल गांधींचे भाषण दुपारी 12 वाजता सुरू होऊ शकते. बुधवारी आणि गुरुवारीही अविश्वास ठरावावर चर्चा होणार आहे. यानंतर पंतप्रधान नरेंद्र मोदी गुरुवारी दुपारी ४ वाजता अविश्वासावरील चर्चेला उत्तर देतील. मोदी सरकार दुसऱ्या कार्यकाळात पहिल्यांदाच अविश्वास प्रस्तावाला सामोरे जात आहे. मणिपूरमधील हिंसाचाराच्या पार्श्वभूमीवर, 26 जुलै रोजी काँग्रेस नेते गौरव गोगोई यांनी लोकसभेत केंद्र सरकारविरोधात अविश्वास प्रस्ताव आणला.

लोकसभेत अविश्वास प्रस्तावावरील चर्चेदरम्यान 2 दिवसात एकूण 12 तासांचा वेळ देण्यात आला आहे. भाजपला 6 तास 41 मिनिटे तर काँग्रेसला एक तास 9 मिनिटे देण्यात आली आहेत.

डीएमके – 30 मिनिटे
टीएमसी – 30 मिनिटे
YSRCP – 29 मिनिटे
शिवसेना – 24 मिनिटे
JDU – 21 मिनिटे
बीजेडी – 16 मिनिटे
बसपा – 12 मिनिटे
BRS – 12 मिनिटे
एलजेएसपी – 8 मिनिटे
बाकी NDA समर्थक पक्षांना आणि अपक्षांच्या खासदारांना 17 मिनिटे देण्यात आली आहेत, यामध्ये AIADMK, AJSU, MNF, NPP, SKM सारखे पक्ष आहेत. सपा, एनसीपी, सीपीआय, टीडीपी, जेडीएस, शिरोमणी अकाली दल, आम आदमी पार्टी या पक्षांना 52 मिनिटांचा वेळ देण्यात आला आहे.

भाजपच्या वतीने कोण बोलणार?
भाजपच्या अविश्वास प्रस्तावावर निशिकांत दुबे हे पहिले वक्ते असतील. दुबे यांच्याशिवाय केंद्रीय मंत्री स्मृती इराणी, निर्मला सीतारामन, ज्योतिरादित्य आणि राजवर्धन राठौर हेही सभागृहात बोलणार आहेत. अविश्वास ठरावाच्या चर्चेत भाजपचे सुमारे 20 वक्ते आपली बाजू मांडणार आहेत. अविश्वास प्रस्तावावर चर्चा सुरू होण्यापूर्वी संसदेच्या ग्रंथालय भवनात होणाऱ्या भाजपच्या बैठकीत पक्षाकडून रणनीती निश्चित केली जाणार आहे.

राहुलच्या पुनरागमनाने ‘इंडिया’ आघाडीला बळ मिळाले
मोदी आडनावाच्या वक्तव्याशी संबंधित मानहानीच्या प्रकरणात राहुल गांधींना सुनावलेल्या दोन वर्षांच्या शिक्षेला सर्वोच्च न्यायालयाने स्थगिती दिली आहे. यानंतर काल त्यांचे संसदीय सदस्यत्व लोकसभा सचिवालयाने बहाल केले. राहुल गांधी १३७ दिवसांनी लोकसभेत पोहोचले. अविश्वास प्रस्तावावरील चर्चेच्या एक दिवस आधी राहुल यांचे संसदीय सदस्यत्व बहाल केल्याने भारतीय राष्ट्रीय विकास समावेशक आघाडी (इंडिया) च्या उत्साहाला चालना मिळणार आहे.