नवी दिल्ली । देशाची राजधानी दिल्लीमधील लाल किल्ल्याजवळील मेट्रो स्टेशनच्या गेट क्रमांक 1 वर कारमध्ये भीषण स्फोट झाला. आय २० या कारमध्ये सायंकाळी 6.52 वाजता भयंकर स्फोट झाल्यांनतर आग भडकली व परिसरातील अनेक वाहनांनी पेट घेतला.या स्फोटात नऊ जणांचा मृत्यू झाला आहे आणि २० हून अधिक जण जखमी झाले आहेत. गृहमंत्री अमित शहा यांनी दिल्ली पोलिस आणि गुप्तचर संस्थांच्या प्रमुखांशी चर्चा केली आणि घटनास्थळी तज्ज्ञांचे पथक पाठवण्याचे निर्देश दिले. पंतप्रधान नरेंद्र मोदी यांनीही परिस्थितीचा आढावा घेतला आणि मृतांना श्रद्धांजली वाहिली.
दरम्यान, स्फोट इतका शक्तिशाली होता की लोकांना आयटीओपर्यंत स्फोटाचा धक्का जाणवला. जवळच्या पार्क केलेल्या वाहनांच्या काचा फुटल्या आणि मेट्रो स्टेशनच्या खिडक्या फुटल्या. परिसरात घबराट पसरली आणि आकाशात आगीचे गोळे उडताना पाहून लोक घाबरले.
पीटीआय या वृत्तसंस्थेच्या वृत्तानुसार, दिल्ली पोलिसांनी कार मालक मोहम्मद सलमान याला ताब्यात घेतले, ज्याने दीड वर्षांपूर्वी ओखला येथील देवेंद्र नावाच्या व्यक्तीला कार विकल्याचे उघड केले. तपासात असे दिसून आले की ही कार नंतर अंबाला आणि नंतर पुलवामा येथील तारिक नावाच्या व्यक्तीला पोहोचली. पोलिस आता या नेटवर्कच्या लिंक्स जोडण्याचे काम करत आहेत. दिल्ली पोलिसांनी बेकायदेशीर क्रियाकलाप (प्रतिबंध) कायद्याअंतर्गत (UAPA) गुन्हा दाखल केला आहे.
स्फोटानंतर, दिल्लीत हाय अलर्ट जारी करण्यात आला आहे. सीमांवर सुरक्षा वाढवण्यात आली आहे आणि वाहनांची कसून तपासणी केली जात आहे. चांदणी चौक व्यापारी संघटनेने जारी केलेल्या व्हिडिओमध्ये स्फोटाचे भयानक दृश्य दाखवण्यात आले आहे, ज्यामध्ये रस्त्यावर मृतदेह पडलेले, जळत्या गाड्या आणि मदतीसाठी ओरडणारे घाबरलेले लोक दिसत आहेत.
Discussion about this post