जळगाव : नातेवाइकांकडे दशक्रिया विधीसाठी जात असताना वाळू वाहतूक करणाऱ्या विनाक्रमांकाच्या डंपरने दुचाकीला धडक दिली. यात एका 64 वर्षीय प्रौढाचा जागीच मृत्यू झाल्याची घटना रविवारी पळासखेडा मिराचे गावाजवळ घडली. कमलाकर मोतीराम पाटील (६४, रा. जळके, ता. जळगाव) असं मृत व्यक्तीचे नाव असून अपघातानंतर डंपर चालक पसार झाला व काही वेळानंतर घटनास्थळावरून डंपर ही पळवून नेण्यात आले.
जिल्ह्यात वाळू उपसा बंद असला तरी अनेक ठिकाणी वाळूची सर्रास वाहतूक सुरू असल्याचे अनेक घटनांवरून वारंवार समोर येत आहे. त्यात रविवारीदेखील विनाक्रमांकाच्या डंपरमधून वाळू वाहतूक सुरू असताना या वाहनाने एका जणाचा जीव घेतल्याने संतप्त ग्रामस्थांनी प्रशासनाच्या कारभारावर प्रश्नचिन्ह उपस्थित केले.
जळगाव तालुक्यातील जळके येथील रहिवासी असलेले कमलाकर पाटील यांचे गावातच किराणा दुकान आहे. रविवारी त्यांच्या नातेवाइकांकडे दशक्रिया विधी असल्याने ते जामनेर तालुक्यातील नाचणखेडा येथे दुचाकीने (क्र. एमएच १९, डीएन ७९१४) जात होते. पळासखेडा मिराचे गावाच्या थोडे पुढे गेल्यानंतर शाळेजवळ समोरून येणाऱ्या विना क्रमांकाच्या भरधाव वाळूच्या डंपरने दुचाकीला जोरदार धडक दिली. यात कमलाकर पाटील हे ठार झाले. अपघातानंतर परिसरातील नागरिकांनी घटनास्थळी धाव घेतली.
अपघातानंतर पाटील यांना शासकीय वैद्यकीय महाविद्यालय व रुग्णालयात नेण्यात आले. मात्र तोपर्यंत त्यांचा मृत्यू झालेला होता. घटनेची माहिती मिळाल्यानंतर ग्रामस्थ तसेच नातेवाइकांची रुग्णालयात गर्दी झाली होती.
दरम्यान अपघातानंतर डंपरचा चालक घटनास्थळावरून पसार झाला. घटनास्थळी वाहतूकदारांनी येऊन वाळू वाळू उपसून डंपर घेऊन पसार झाले. वाळू वाहतूकदारांच्या या मुजोरीबद्दल नागरिकांनी मोठा संताप व्यक्त केला.
Discussion about this post