बुलढाणा : बुलढाणा जिल्ह्यातील अंढेरा पोलिसांच्या हद्दीत शेतकऱ्याने पोलिसांच्या नाकावर टिच्चून चक्क अफूची शेती केल्याचा प्रकार उघडकीस आला आहे. या घटनेची माहिती मिळाल्यानं स्थानिक गुन्हे शाखेनं शुक्रवारी मध्यरात्री या अफूच्या शेतीवर छापेमारी केली. पोलिसांनी या शेतकऱ्याच्या शेतातून तब्बल 12.61 कोटी रुपयाच्या अफूची झाडे जप्त केल्याच्या कारवाईमुळे संपूर्ण राज्यात खळबळ उडाली आहे. संतोष सानप असं त्या अफूची शेती करणाऱ्या शेतकऱ्याचं नाव असल्याची माहिती पोलीस सूत्रांनी दिली आहे.
याप्रकरणी पोलिसांनी संतोष सानप या शेतकऱ्याला अटक केली असून त्याच्यावर कलम ८ क, १८ क आणि एनडीपीएस कायद्यानुसार गुन्हा दाखल केला आहे. अफूच्या शेतीवर छापेमारी टाकल्याची राज्यातील ही सर्वात मोठी कारवाई असल्याचं बोललं जात आहे. अंढेरा पोलीस स्टेशनच्या हद्दीत अंढेरा पोलिसांच्या नाकावर टिच्चून अफूची शेती होत करण्यात येत होती. मात्र तरीही अंढेरा पोलिसांनी या अफूच्या शेतीवर कोणतीच कारवाई करण्यात आली नसल्यानं नागरिकांनी आश्चर्य व्यक्त केलं. त्यामुळे अंढेरा पोलिसांच्या कार्यक्षमतेवर आता प्रश्नचिन्ह उभं राहिलं आहे.
जिल्हा पोलीस अधीक्षक विश्व पानसरे यांच्या मार्गदर्शनात अप्पर पोलीस अधीक्षक अशोक थोरात, बी बी महामुनी यांच्या नेतृत्वात आणि देऊळगाव राजाच्या उपविभागीय पोलीस अधिकारी मनिषा कदम यांच्या मार्गदर्शनाखाली स्थानिक गुन्हे शाखेचं (एलसीबी) पोलीस निरीक्षक अशोक लांडे, सहायक पोलीस निरीक्षक आशीष रोही, रूपेश शक्करगे, पोलीस उपनिरीक्षक सचिन कानडे, प्रताप बाजड आदींनी ही कारवाई यशस्वी केली. स्थानिक अंढेरा पोलिसांना कारवाईचा सुगावा न लागू देता स्थानिक गुन्हे शाखेनं ( एलसीबी ) ही कारवाई केल्याची चर्चा आहे.
Discussion about this post