राज्यसभेसाठी शरद पवारांच्या नावाला काँग्रेसमधून विरोध? हर्षवर्धन सपकाळ म्हणाले..

मुंबई : महाराष्ट्रातील राज्यसभेच्या ७ जागा रिक्त होत असून, त्यासाठी आयोगाकडून निवडणुकीची अधिकृत घोषणा करण्यात आली आहे. यामध्ये राष्ट्रवादी काँग्रेसचे अध्यक्ष शरद पवार हे देखील निवृत्त होत आहे. शरद पवार पुन्हा राज्यसभेवर जाणार असल्याची चर्चा राजकारणात जोर धरत आहे. पण शरद पवार यांच्या नावाला काँग्रेसच्या एका गटाकडून विरोध असल्याची माहिती समोर आली आहे

गेल्या काही दिवसांपासून राष्ट्रवादी काँग्रेसच्या दोन गटांच्या विलीन होण्याची चर्चा होती, परंतु आता दोन्ही बाजू स्वतंत्रपणे पक्ष वाढवण्याचा निर्णय घेत असल्याचेही समोर आले आहे. याच पार्श्वभूमीवर काँग्रेस नेते हर्षवर्धन सपकाळ यांनी महाविकास आघाडीची पुढील रणनीती आणि शरद पवारांच्या राज्यसभेच्या उमेदवारीबाबत आपले मत व्यक्त केले.

शरद पवार यांच्या राज्यसभेच्या उमेदवारीवरून काँग्रेसमध्ये विरोध असल्याच्या चर्चेवर बोलताना सपकाळ म्हणाले की, “या संदर्भात वरिष्ठ जो काही निर्णय घेतील, तो आम्हाला मान्य असेल” असं म्हणाले आहे.

दरम्यान, राज्यसभेच्या निवडणुकीसाठी १६ मार्च रोजी मतदान होईल. राज्यसभा निवडणूक जाहीर झाल्याने राजकीय पक्षांमध्ये मतांची जुळवाजुळव सुरू झाली आहे. विधानसभा निवडणुकीनंतर जवळपास निकालात निघालेल्या महाविकास आघाडीच्या ऐक्याची या निवडणुकीत कसोटी लागणार आहे. त्यात महाविकास आघाडीच्या वाट्याला राज्यसभेची एकच जागा येत असल्याने ती शरद पवार यांना दिली जाणार की, अन्य कोणाला दिली जाणार हे आगामी दिवसात समजेल .