जळगाव । जळगाव शहरातील चित्रा चौक आणि पोलनपेठ परिसरात झालेल्या चोरीच्या घटनांमध्ये स्थानिक गुन्हे शाखेच्या पथकाने एका संशयित आरोपीला अजिंठा चौकातून अटक केली आहे. प्रविण वसंत सपकाळे (वय ४४, रा. भोलाणे, ता. जळगाव) असं ताब्यात घेतलेल्या संशयीत आरोपीचे नाव असून त्याच्याकडून एकूण १८ हजार ९८० रुपये जप्त करण्यात आले आहेत.
दिनांक २ जानेवारी रोजी पहाटे चित्रा चौक येथील “जिल्हा कृषी आद्योगिक सर्वेसर्वो सहकारी संस्था मर्यादित” कापड दुकानाचे दरवाज्याचे कुलूप तोडून अज्ञात इसमाने ड्रॉवरमधून ८ हजार रुपये चोरून नेले होते. या घटनेबाबत कमलाकर अभिमन ठाकरे, रा. घनश्याम नगर जळगाव यांनी फिर्याद दिली होती. यासह, दि. ६ जानेवारी रोजी पोलनपेठ जळगाव येथील नरेश डुंगरशी सोनी यांचे पापूलर ट्रेडर्स तेल दुकान, योगेश रामप्रसाद अग्रवाल यांचे योगेश प्रोव्हीजन किराणा दुकान आणि मिलीद अंबादास अटवाल यांचे तिरूपती हेअर आर्ट दुकान यांच्या दरवाज्याचे कुलूप तोडून अज्ञात इसमाने एकूण ३ हजार ६०० रुपये चोरून नेले होते. या दोन्ही घटनांबाबत जळगाव शहर पोलीस स्टेशनला गुन्हा दाखल करण्यात आला होता.
तपास आणि अटक
हे दोन्ही गुन्हे जळगाव शहरातील मुख्य बाजार परिसरात घडल्याने, पोलिस अधीक्षक माहेश्वर रेड्डी यांनी तपास सुरु करण्याचे आदेश दिले होते. स्थानिक गुन्हे शाखेचे पोलिस उपनिरीक्षक दत्तात्रय पोटे, राजेश मेढे, संजय हिवरकर, अतुल वंजारी, विजय पाटील आणि हरीलाल पाटील यांच्या टीमने तपास सुरु केला. तपासादरम्यान, रेकॉर्डवरील गुन्हेगार प्रविण वसंत सपकाळे याचा शोध घेतला आणि त्याला अंजिठा चौफुली जळगाव येथून ताब्यात घेतल्यावर त्याने या दोन्ही गुन्ह्यांची कबुली दिली. आरोपीवर यापूर्वी तीन घरफोडीचे गुन्हे दाखल आहेत.
Discussion about this post