जळगाव । जळगाव जिल्ह्यात घरफोडीच्या घटनांचे सत्र काही केल्या कमी होताना दिसत नसून अशातच चोरट्यांनी चक्क नगरसेवकाच्या घरात मोठी हातसफाई केलीय. रावेर शहराच्या मध्यवर्ती रामबाग परिसरात नगरसेवक दिलीप हिरामण पाटील यांच्या घरात अज्ञात चोरट्यांनी धाडसी चोरी केली. चोरट्यांनी घराच्या मागील बाजूच्या खिडकीचे लोखंडी गज कापून प्रवेश करत, कपाटातील रोख रक्कम व सोन्याचंदीचे दागिने चोरून नेले. प्राथमिक अंदाजानुसार, लाखो रुपयांचा ऐवज लंपास झाला आहे.
मध्यरात्री दिलीप पाटील यांच्या घराच्या मागील बाजूने अज्ञात चोरट्यांनी खिडकीचे लोखंडी गज कापून घरात अनधिकृतपणे प्रवेश करीत चोरी केली आहे. कपाटातील रोख रक्कम व सोन्याचांदीचे दागिने असा मिळून लाखो रुपयांचा ऐवज लंपास केला आहे. चोरी झाली तेव्हा दिलीप पाटील कुटुंबियांसह घरात झोपलेले होते. मात्र याचा त्यांना चोरट्यांनी थांगपत्ता लागू दिला नाही.
सकाळी उठल्यावर घरात चोरी झाल्याची घटना त्यांच्या निदर्शनास आली. त्यांनी तात्काळ पोलिसांना याची माहिती दिल्यावर पोलीस निरीक्षक डॉ विशाल जयस्वाल कर्मचाऱ्यांसह घटनास्थळी दाखल झाले. घटनास्थळी ठसे तज्ञ व श्वानपथक दाखल झाले असून तपासाच्या दृष्टीने पुरावे गोळा करण्याचे काम सुरु आहे. शहराच्या मध्यवर्ती भागात झालेल्या या जबरी चोरीच्या घटनेने शहरात खळबळ उडाली आहे. पोलीस ठाण्यापासून अवघ्या ३०० मीटर अंतरावर झालेल्या धाडसी चोरीच्या घटनेने पोलिसांपुढे तपासाचे मोठे आव्हान निर्माण झाले आहे. पोलिसांनी रात्रीची गस्त वाढवावी अशी मागणी नागरिकांनी केली आहे.
Discussion about this post