ठाणे । कल्याण डोंबिवली शहरात मोठा राजकीय राडा झाला. भाजप आमदार गणपत गायकवाड यांनी चक्क शिंदे गटाच्या नेत्यांवर गोळीबार केल्याची धक्कादायक घटना घडली. उल्हासनगरच्या हिललाईन पोलीस ठाण्यात हा सगळा प्रकार घडला. या प्रकरणात तीन जणांवर गुन्हा दाखल झाला असून आमदार गणपत गायकवाड यांना अटक करण्यात आली आहे.
भाजपा आमदार गणपत गायकवाड यांनी सत्ताधारी शिवसेना पदाधिकाऱ्यावर, महेश गायकवाड याच्यावर सहा गोळ्या झाडल्या. रात्री घडलेल्या या संपूर्ण प्रकारामुळे शहरचं नव्हे तर अख्खा ठाणे जिल्हा हादरला. या घटनेनंतर उल्हासनगरसह कल्याणमध्ये तणावाचं वातावरण असून शिंदे गटाचे कार्यकर्ते संतापले आहेत.
तणावाचं वातावरण या पार्श्वभूमीवर पोलिसांनी आमदार गणपत गायकवाड यांचं घर तसेच कार्यालयाबाहेर तगडा बंदोबस्त तैनात केला आहे. तर दुसरीकडे या हल्ल्यामुळे शिंदे गटातील कार्यकर्ते प्रचंड संतापले असून त्यांनी कल्याण पूर्व परिसरात बंदची हाक दिली आहे. खबरदारी म्हणून माजी नगरसेवक, कल्याण शहर प्रमुख महेश गायकवाड यांच्या कार्यालयासह घराजवळही पोलिसांचा फौजफाटा असून कोणताही अनुचित प्रकार घडू नये म्हणून दंगल नियंत्रक पथकही तैनात करण्यात आलं आहे. उल्हासनगरच नव्हे तर कल्याणमध्येही या घटनेचे पडसाद उमटले असून कल्याण बंदची हाक देण्यात आली आहे.
Discussion about this post