मुंबई । सतत वादग्रस्त विधानाने परिचित असलेले भाजप नेते आणि राज्याचे मत्स्यव्यवसाय आणि बंदरे विकास मंत्री नितेश राणे यांच्या अडचणीत वाढ झाली आहे. कारण मुंबईतील माझगाव कोर्टाने नितेश राणे यांना दणका दिला आहे. शिवसेना ( उद्धव ठाकरे गट) खासदार संजय राऊत यांच्या मानहानीच्या खटल्याच्या सुनावणीला हजर राहण्यापासून कायमस्वरूपी सूट देण्यास नकार दिला आहे. तसेच, कोर्टाने त्यांच्या विरोधात अजामीनपात्र वॉरंट बजावले आहे.
शिवसेना (ठाकरे गट) खासदार संजय राऊत यांनी 2023 मध्ये दाखल केलेल्या मानहानीच्या फौजदारी तक्रारीच्या प्रकरणात, मुंबईतील माझगाव कोर्टाने भाजप नेते नितेश राणे यांना सुनावणीला उपस्थित राहण्यापासून कायमस्वरूपी सूट देण्यास नकार दिला. याचवेळी, राणे यांच्याविरुद्ध अजामीनपात्र वॉरंट बजावण्यात आले.
गेल्या महिन्यात, खटल्याच्या सुनावणीला अनुपस्थित राहिल्याबद्दल कोर्टने राणे यांच्याविरुद्ध जामीनपात्र वॉरंट बजावले होते. 2 जून रोजी झालेल्या सुनावणीदरम्यान, राणे यांनी सुनावणीला उपस्थित राहण्यापासून कायमची सूट मिळवण्यासाठी अर्ज दाखल केला होता. या अर्जावर न्यायाधीश ए.कुलकर्णी यांनी गुरुवारी (26 जून) निर्णय देताना तो फेटाळला. तसेच, राणे यांच्याविरुद्ध अजामीनपात्र वॉरंट काढून सुनावणी 18 जुलैपर्यंत तहकूब केली.
दोन वर्षांपूर्वी, नितेश राणे यांनी संजय राऊत यांना “साप” म्हणून संबोधले होते. राऊत हे उद्धव ठाकरे यांना सोडून राष्ट्रवादी काँग्रेसमध्ये सामील होतील, असा आरोप केला होता. त्यानंतर, राऊत यांनी राणे यांच्याविरुद्ध मानहानीची फौजदारी तक्रार दाखल केली होती आणि बदनामीप्रकरणी कारवाईची मागणी केली होती.
काय आहे हे प्रकरण?
खासदार संजय राऊत यांनी नितेश राणे यांच्या विरोधात सन 2023 मध्ये मानहानीची फौजदारी तक्रार दाखल केली होती. नितेश राणे यांनी दोन वर्षांपूर्वी राऊत यांना “साप” अशी उपमा दिली होती. शिवसेनेला ‘जय महाराष्ट्र’ करून ते राष्ट्रवादी काँग्रेसमध्ये जाणार असल्याचा आरोप केला होता. यावरून राऊत यांनी राणे यांच्याविरोधात कोर्टात तक्रार दाखल केली होती.
या प्रकरणामुळे राजकीय वर्तुळात पुन्हा एकदा राऊत-राणे यांच्यातील वाद चव्हाट्यावर आला असून, न्यायालयीन निर्णयामुळे नितेश राणे यांना आता न्यायप्रक्रियेला सामोरे जावे लागणार आहे.
Discussion about this post