आज, 1 नोव्हेंबरपासून पैसे आणि बँक व्यवहारांचे नियम बदलले! काय आहेत लगेचच घ्या जाणून

मुंबई । दर महिलेच्या पहिल्या तारखेला अनेक नियम बदलत असतात. त्याचनुसार आजपासून सर्वसामान्य नागरिकांच्या खिशाशी आणि बँकिंग सेवांशी संबंधित अनेक महत्त्वपूर्ण नियमांमध्ये बदल झाले आहेत. जर तुमचं बँक खाते, एसबीआय क्रेडिट कार्ड किंवा शासकीय पेन्शन यापैकी कुठल्याही सेवेशी नातं असेल, तर हे नवे नियम आता तुमच्यावर लागू झाले आहेत. रिझर्व्ह बँक आणि वित्त मंत्रालयाने जारी केलेले हे नियम 1 नोव्हेंबर 2025 पासून लागू झाले आहेत.

या नव्या नियमानुसार, बँक खात्यात चार नॉमिनी जोडण्याची सुविधा, एसबीआय कार्डवर १% नवीन शुल्क, युनिफाइड पेन्शन स्कीम (UPS) साठी नवीन अंतिम तारीख, तसेच पेन्शनधारकांसाठी जीवन प्रमाणपत्र सादर करण्याची सुधारित प्रक्रिया यांचा समावेश आहे. या बदलांचा उद्देश बँकिंग प्रणाली अधिक पारदर्शक, डिजिटल आणि सुलभ बनवणे हा आहे.

आता बँक ग्राहकांना मोठा दिलासा मिळाला आहे. आजपासून तुम्ही तुमच्या बँक खात्यात चार नॉमिनीपर्यंत नोंदणी करू शकता. यापूर्वी फक्त एकाच व्यक्तीला नॉमिनी म्हणून नोंदवण्याची परवानगी होती. नवीन व्यवस्थेनुसार, ग्राहक इच्छेनुसार सर्व नॉमिनी एकाच वेळी (simultaneous) किंवा एकामागोमाग (successive) जोडू शकतात. त्यामुळे भविष्यात क्लेम प्रक्रिया अधिक सोपी होईल. मात्र, बँक लॉकरसाठी फक्त क्रमवार नॉमिनेशनचीच सुविधा लागू असेल. म्हणजे, जर पहिला नॉमिनी उपलब्ध नसेल, तरच दुसरा नॉमिनी त्याची जागा घेऊ शकेल.

देशातील सर्वात मोठी कार्ड सेवा देणारी कंपनी एसबीआय कार्डने आजपासून आपल्या शुल्क संरचनेत बदल केला आहे.

आता जर तुम्ही CRED, Cheq किंवा MobiKwik सारख्या थर्ड पार्टी अॅपद्वारे शाळा किंवा कॉलेजची फी भरत असाल, तर तुम्हाला 1% अतिरिक्त शुल्क आकारले जाईल. मात्र, जर तुम्ही थेट शाळेच्या वेबसाइटवरून किंवा त्यांच्या POS मशीनद्वारे पेमेंट केले, तर कोणताही अतिरिक्त चार्ज आकारला जाणार नाही.

याशिवाय, काही निवडक श्रेणींमध्ये ₹1,000 पेक्षा अधिक वॉलेट टॉप-अप केल्यासही आता 1% शुल्क लागू होईल. हा बदल आजपासून लागू झाला असून कार्डधारकांनी याची नोंद घ्यावी, अशी सूचना करण्यात आली आहे.

केंद्र सरकारने कर्मचाऱ्यांना दिलासा देत युनिफाइड पेन्शन स्कीम (UPS) मध्ये सहभागी होण्यासाठीची अंतिम तारीख 30 नोव्हेंबर 2025 पर्यंत वाढवली आहे. यापूर्वी ही मुदत 30 सप्टेंबर होती, परंतु कर्मचाऱ्यांच्या आणि विविध विभागांच्या मागणीवरून सरकारने ती दोन महिन्यांनी पुढे ढकलली आहे.

आजपासून केंद्र आणि राज्य सरकारच्या पेन्शनधारकांसाठी जीवन प्रमाणपत्र (Life Certificate) सादर करण्याची प्रक्रिया सुरू झाली आहे. हे प्रमाणपत्र तुम्ही Jeevan Pramaan Portal वरून डिजिटल पद्धतीने किंवा जवळच्या बँक व पोस्ट ऑफिसमध्ये प्रत्यक्ष जाऊन जमा करू शकता. या प्रक्रियेची अंतिम तारीख 30 नोव्हेंबर 2025 निश्चित करण्यात आली आहे. जर या तारखेपर्यंत जीवन प्रमाणपत्र जमा केले नाही, तर पेन्शन वितरणात अडचणी निर्माण होऊ शकतात.