जळगाव : जळगाव जिल्ह्यातील रेल्वे प्रवाशांना दिलासा देणारी बातमी आहे. मध्य रेल्वेने प्रवाशांची वाढती गर्दी लक्षात घेऊन बडनेरा–नाशिक रोड दरम्यान धावणाऱ्या अनारक्षित विशेष मेमू गाडीच्या सेवेला पुन्हा एकदा मुदतवाढ देण्याचा निर्णय घेतला आहे.
मध्य रेल्वेच्या भुसावळ मंडळाकडून मिळालेल्या माहितीनुसार, गाडी क्रमांक ०१२११ बडनेरा–नाशिक रोड अनारक्षित दैनिक विशेष मेमू गाडी यापूर्वी २८ फेब्रुवारीपर्यंत चालविण्याचे नियोजन होते. मात्र, आता ही गाडी ०१ मार्च ते १५ जुलै २०२६ या कालावधीत धावणार आहे.
त्याचप्रमाणे, गाडी क्रमांक ०१२१२ नाशिक रोड–बडनेरा अनारक्षित दैनिक विशेष ही गाडी देखील २८ फेब्रुवारीपर्यंत चालविण्यात येणार होती. आता ती १५ जुलै २०२६ या कालावधीत धावणार आहे.
या निर्णयामुळे विदर्भासह उत्तर महाराष्ट्र यादरम्यान प्रवास करणाऱ्या सर्वसामान्य नागरिकांना मोठा दिलासा मिळणार असल्याचे दिसून येत आहे.बडनेरा जंक्शन ते नाशिक रोड रेल्वे स्थानक दरम्यान धावणारी ही विशेष मेमू गाडी जळगाव जिल्ह्यातील बोदवड, भुसावळ जंक्शन, जळगाव जंक्शन, पाचोरा, कजगाव आणि चाळीसगाव जंक्श्न स्थानकांवर थांबा घेते.
Discussion about this post