औरंगाबाद : कीर्तनकार इंदोरीकर महाराज यांना बेताल वक्तव्य करणं भोवलं आहे. इंदोरीकर महाराज यांच्याविरोधात गुन्हा दाखल करा, असे आदेश औरंगाबाद कोर्टाने दिले आहेत.
इंदोरीकर महाराजांनी किर्तनातून लिंगभेदावर भाष्य केलं होतं. सम आणि विषम तारखेला शरीर संबंध ठेवल्यास मुलगा आणि मुलगी होत असल्याचं इंदोरीकर महाराज म्हणाले होते. त्यांच्या या विधानावरून एकच खळबळ उडाली होती. त्यामुळे अंधश्रद्धा निर्मुलन समितीने औरंगाबाद न्यायालयात याचिका दाखल केली होती. यावर आज सुनावणी झाली.
दरम्यान, इंदोरीकर महाराजांनी केलेल्या वक्तव्याचा व्हिडिओ व्हायरल झाला होता. यावरून त्यांच्यावर टीका झाली होती. दरम्यान, अहमदनगर जिल्हा आरोग्य विभागाच्या पीसीपीएनडीटी समितीनं नोटीस बजावून खुलासा मागवला होता. त्यानंतर इंदुरीकरांनी उद्विग्नता व्यक्त करत कीर्तन सोडून शेती करणार असल्याचं सांगितलं होतं. त्यामुळं त्यांच्या चाहत्यांमध्ये तीव्र नाराजी पसरली होती.
मात्र, इंदुरीकरांनी त्यांना आंदोलनं आणि मोर्चे काढण्यापासून रोखलं. पुढे अहमदनगर जिल्हा सत्र न्यायालयाने त्यांना दिलासा दिला होता. त्यानंतर अंधश्रद्धा निर्मूलन समितीनं इंदुरीकर महाराजांविरोधात औरंगाबाद खंडपीठात धाव घेत याचिका दाखल केली होती. शुक्रवारी या याचिकेवर सुनावणी झाली. या सुनावणीत इंदुरीकर महाराज यांच्यावर तातडीने गुन्हा दाखल करण्यात यावा, असे आदेश खंडपीठाने पोलिसांना दिले आहेत.
Discussion about this post