नाशिकमधील भोंदू अशोक खरात प्रकरणात तपास जसजसा पुढे सरकत आहे, तसतसे त्याच्या फसवणुकीचे नवे आणि धक्कादायक पैलू समोर येत आहेत. विशेष तपास पथक (एसआयटी) करत असलेल्या चौकशीत खरातने श्रद्धेच्या नावाखाली मोठ्या प्रमाणावर आर्थिक गैरव्यवहार केल्याची माहिती उघड झाली आहे. त्याच्या भेटीसाठी लाखो रुपयांची फी आकारली जात असल्याचे तपासात स्पष्ट झाले आहे.
तपास यंत्रणांच्या माहितीनुसार, अशोक खरात केवळ काही तासांच्या भेटीसाठी मोठी रक्कम मागत असे. भक्तांच्या घरी किंवा फार्महाऊसवर जाण्यासाठी तो विशेष सोयी-सुविधांची अट घालत असे. महागड्या गाड्या, आलिशान व्यवस्था आणि लांबच्या प्रवासासाठी विमान प्रवासाची मागणी ही त्याच्या अटींचा भाग असल्याचे समोर आले आहे. या माध्यमातून त्याने मोठ्या प्रमाणावर पैसा उकळल्याचा संशय व्यक्त केला जात आहे.
दरम्यान, अमावस्या आणि पौर्णिमेच्या दिवशी त्याच्या निवासस्थानाबाहेर श्रीमंत भक्तांची मोठी गर्दी होत असल्याची माहितीही तपासात समोर आली आहे. या दिवशी विशेष पूजा आणि विधी करण्याच्या नावाखाली मोठ्या रकमा आकारल्या जात असल्याचे सांगितले जात आहे.
सोमवारी एसआयटी पथकाने खरातच्या कार्यालयाची झडती घेतली असता अनेक संशयास्पद वस्तू जप्त करण्यात आल्या. यात काही अन्नपदार्थ, जडीबुटीसदृश वस्तू आणि विविध उपकरणांचा समावेश आहे. तसेच भक्तांची नावे आणि व्यवहारांची माहिती असलेली नोंदवहीही पोलिसांच्या हाती लागली आहे. या नोंदींच्या आधारे आणखी काही महत्त्वाची नावे आणि व्यवहार उघड होण्याची शक्यता वर्तवली जात आहे.
याशिवाय, खरातच्या कार्यालयातील दरवाजे आणि काचा आवाज बाहेर जाऊ नयेत यासाठी विशेष पद्धतीने बसवण्यात आल्या होत्या का, याची फॉरेन्सिक तज्ज्ञांकडून तपासणी सुरू आहे. तपासादरम्यान घटनास्थळी नेण्यात आल्यानंतर पीडितेला घडलेल्या प्रकाराची आठवण झाल्याने ती भावूक झाल्याचेही समजते. या प्रकरणाचा तपास वेगाने सुरू असून पुढील काही दिवसांत आणखी धक्कादायक माहिती समोर येण्याची शक्यता व्यक्त केली जात आहे.
Discussion about this post