नाशिक । स्वतःला धार्मिक गुरू म्हणून सादर करणाऱ्या अशोक खरात याच्या अटकेनंतर त्याचे एकामागोमाग एक काळे कारनामे समोर येत असून संपूर्ण महाराष्ट्रात खळबळ उडाली आहे. महिलांचे लैंगिक शोषण केल्याच्या गंभीर आरोपांमुळे पोलिसांनी त्याच्याविरोधात चौकशी अधिक तीव्र केली आहे.
तपासादरम्यान आणखी एक धक्कादायक माहिती समोर आली असून, एका विद्यार्थिनीवर अत्याचार केल्याप्रकरणी खरातविरोधात नवीन गुन्हा नोंदवण्यात आला आहे. या नराधमाने विद्यार्थिनीलाही सोडले नसल्याचे समोर आलं आहे. त्यामुळे त्याच्याविरोधातील एकूण गुन्ह्यांची संख्या आता सहावर पोहोचली आहे. महिलांकडून सातत्याने तक्रारी येत असल्याने पोलिसांकडून कसून तपास सुरू आहे.
तपासात असेही उघड झाले आहे की, लग्न जुळवणे, धार्मिक विधी आणि तंत्र-मंत्राच्या नावाखाली लोकांची फसवणूक केल्याचे आरोप खरातवर आहेत. विश्वास संपादन करून महिलांचे शोषण केल्याचा संशय व्यक्त केला जात आहे.
दरम्यान, खरातने स्थापन केलेल्या ‘शिवनिका संस्थान’च्या माध्यमातून विश्वस्तांची फसवणूक झाल्याची माहिती समोर आली आहे. संस्थेच्या स्थापनेवेळी अभ्यासिका, CBSE शाळा आणि गोशाळा सुरू करण्याचे आश्वासन देण्यात आले होते. मात्र, गेल्या १५ वर्षांत हे प्रकल्प सुरू न होता त्याची वैयक्तिक संपत्ती मात्र वाढत गेल्याचा आरोप स्थानिकांकडून करण्यात येत आहे.
Discussion about this post