मुंबई: अंमलबजावणी संचालनालयाने (ईडी) उद्योगपती अनिल अंबानी आणि रिलायन्स पॉवरशी संबंधित कंपन्यांविरुद्ध पुन्हा मोठी कारवाई केली आहे. आज पहाटे ईडीच्या पथकांनी मुंबईतील रिलायन्स पॉवर लिमिटेडशी संबंधित १२ ठिकाणी छापेमारी करून कागदपत्रांची तपासणी सुरू केली आहे. ही कारवाई आर्थिक अनियमितता आणि मनी लाँड्रिंगच्या चौकशीचा भाग असल्याचे समजते.
मिळालेल्या माहितीनुसार, ईडीच्या सुमारे १५ पथकांनी आज पहाटेपासून शोध मोहीम सुरू केली असून रिलायन्स पॉवरशी संबंधित कार्यालयीन ठिकाणे आणि निवासस्थाने तपासण्यात आली आहेत. छापेमारीदरम्यान आर्थिक व्यवहार, निधी हस्तांतरण आणि संभाव्य अनियमिततेसंबंधी कागदपत्रांची तपासणी केली जात आहे.
ईडीच्या कारवाईमुळे उद्योगक्षेत्रात मोठी खळबळ उडाली असून, रिलायन्स पॉवरचे शेअर २ टक्क्यांनी वाढून २३ रुपयांवर पोहचले आहेत. तर रिलायन्स इन्फ्राचे शेअर्स ४ टक्क्यांनी वाढून ९४.२० रुपयांवर पोहचले आहेत.
ईडीची ही कारवाई मुंबई आणि हैदराबादमध्ये केंद्रित होती, आणि तपासात अडथळे येऊ नयेत म्हणून काही ठिकाणांची माहिती अद्याप सार्वजनिक करण्यात आलेली नाही. फेब्रुवारी २०२६ मध्ये ईडीने मुंबईच्या पाली हिल येथील अनिल अंबानींच्या निवासस्थानावर आधीच छापेमारी केली होती.
आजची कारवाई रिलायन्स पॉवरमधील संशयास्पद निधी हस्तांतरण, आर्थिक व्यवहार आणि संभाव्य गैरव्यवहाराच्या चौकशीचा भाग असून, ईडीकडून पुढील तपास सुरू आहे.
Discussion about this post