पुणे : दहीसर येथे झालेल्या अभिषेक घोसाळकर हत्या प्रकरणासारखीच घटना पुण्यात शनिवारी सायंकाळी घडली. आर्थिक कारणावरून सराफ व्यावसायिकाने दुकान मालकावर भरचौकात गोळीबार केला. त्यानंतर रिक्षातून पोलिस ठाण्यात जात असताना रिक्षामध्ये स्वतःवर गोळी झाडून घेऊन आत्महत्या केली. दुकानमालक गंभीर जखमी झाले असून, त्यांच्यावर उपचार करण्यात येत आहेत.
अनिल सखाराम ढमाले (५२, रा. बालेवाडी) असे आत्महत्या केलेल्या सराफ व्यावसायिकाचे नाव आहे. आकाश गजानन जाधव (३९, रा. बाणेर) असे जखमी दुकानमालकाचे नाव आहे. ही घटना बाणेर येथील कळमकर पार्क लेनमध्ये शनिवारी सायंकाळी सहाच्या सुमारास घडली.
अनिल ढमाले सराफ व्यावसायिक आहे. जाधव यांचे बाणेर येथील हाय स्ट्रीटवर दुकान आहे. जाधव यांनी ढमाले याला १४ वर्षापासून दुकान भाड्याने दिले आहे. अनिल ज्वेलर्स म्हणून हे दुकान ढमाले चालवत होता. काही महिन्यांपासून त्यांच्यात आर्थिक वाद होता. ढमाले याने जाधव यांना चहा घेण्यासाठी घरातून खाली बोलावले. घराजवळील कळमकर पार्क लेन नं. १ येथे ते दुचाकीवरून येत असताना मागे बसलेल्या ढमाले याने जाधव यांच्या डोक्यात आपल्या पिस्तुलातून गोळी झाडली. त्यामुळे दोघेही रस्त्यावर पडले. ढमाले याने तेथून पळ काढला. त्याने एक रिक्षा केली व रिक्षाचालक सतीश यादव याला रिक्षा चतुःशृंगी पोलिस ठाण्याकडे घेण्यास सांगितले.
औंध येथील भाले चौकात रिक्षा आली असताना त्याने रिक्षाचालकाला मला पाणी घेऊन ये, असे सांगितले. यादव पाणी आणायला गेले. तेवढ्यात ढमाले याने स्वतःवर गोळी झाडून घेतली आणि त्याचा मृत्यू झाला. पोलिस घटनास्थळी पोहोचले. ढमालेकडे सुसाइड नोट मिळाली. त्यात त्याने तीन महिन्यांपासून जाधव आर्थिक कारणावरून त्रास देत होता. आता मला पर्याय नाही, म्हणून मी हा निर्णय घेत आहे, असे म्हटले आहे.
Discussion about this post