मुंबई । राज्यात सध्या महायुतीचं सरकार आहे. दरम्यान आगामी स्थानिक स्वराज्य संस्थांच्या निवडणुकीसाठी सर्वच पक्षांनी कंबर कसली असून देवेंद्र फडणवीस यांनी आगामी निवडणुका महायुती एकत्र लढवणार असल्याचे सांगितले होते. पण राष्ट्रवादी अजित पवार गट पुणे महापालिका स्वबळावर लढणार असल्याची माहिती समोर आलीय. अजित पवारांनीही आपल्या शिलेदारांना स्वबळावर लढण्याचे स्पष्ट संकेत दिले आहेत. यामुळे अजित पवार गटाकडून भाजपला धक्का बसणार असल्याची शक्यता वर्तवली जात आहे.
राष्ट्रवादी काँग्रेस अजित पवार गटाची आज (३० ऑगस्ट) पुण्यात महत्त्वाची बैठक पार पडली. या बैठकीत माजी पदाधिकारी आणि नगरसेवकांना अजित पवारांनी महत्त्वाच्या सूचना दिल्या. सर्व जागांची तयारी करण्याच्या सूचना अजित पवारांनी पदाधिकाऱ्यांना केल्या. युती होईल की नाही याचा विचार आता करु नका, निवडणुकीपूर्वी शेवटच्या ३ महिन्यात निर्णय घेतला जाईल, असे अजित पवार यांनी म्हटले.
प्रभाग रचनेच्या विरोधात राष्ट्रवादी काँग्रेस अजित पवार गट जाणार नसल्याची माहिती समोर आली आहे. त्या-त्या प्रभाग रचनेच्या पद्धतीत लढण्याची तयारी करण्याच्या सूचना करण्यात आल्या आहेत.
राष्ट्रवादी काँग्रेस अजित पवार गटाच्या नेत्या रुपाली ठोंबरे यांनी पुण्यात राष्ट्रवादी काँग्रेसचाच महापौर होणार असे वक्तव्य केले आहे. आम्ही स्वबळावर लढण्यासाठी आजपासून तयारी करणार आहोत. महायुतीत लढून नुकसान करुन घेण्यापेक्षा स्वबळावर लढून आमचा महापौर बनवू, असे रुपाली ठोंबरे यांनी म्हटले आहे.
Discussion about this post