धरणगाव । जळगाव जिल्ह्यातील धरणगाव तालुक्यातील भवरखेडे येथे घातक रसायनांपासून दूध तयार करून ते ग्राहकांना विकणाऱ्या एका तरूणाला अटक करण्यात आली. सुमारे ८० लिटर भेसळयुक्त दूध नष्ट करण्यात आले आहे.
अटक करण्यात आलेल्या व्यक्तीचे नाव सोमनाथ आनंदा माळी (वय 31) असे आहे. तो भेसळयुक्त दूध तयार करत असल्याची माहिती अन्न सुरक्षा अधिकारी किशोर साळुंखे यांना मिळाल्यानंतर त्यांनी धरणगाव पोलिसांना याबाबत कळवले. त्यानंतर पोलिस आणि अन्न व औषध प्रशासनाच्या संयुक्त पथकाने भवरखेडा येथे छापा टाकला.
छाप्यात माळीच्या घरी भेसळीच्या दुधासाठी वापरली जाणारी रसायने आणि उपकरणे आढळून आली. प्राथमिक चौकशीत माळीने भेसळयुक्त दूध तयार करून विक्री करत असल्याची कबुली दिली आहे. या प्रकरणी अन्न सुरक्षा अधिकारी साळुंखे यांनी दिलेल्या फिर्यादीवरून धरणगाव पोलिस ठाण्यात गुन्हा दाखल करण्यात आला आहे. पुढील तपास सुरू आहे.
Discussion about this post