वीस दिवसापूर्वी लग्न! फिरण्यासाठी प्रबळगडावर गेले, सेल्फी घेताना पतीच्या डोळ्यादेखत दरीत कोसळली

रायगड जिल्ह्यात पनवेनजवळ असलेल्या माची प्रबळगडावर सेल्फी काढताना पाय घसरून तोल गेल्याने 24 वर्षीय नवविवाहित महिलेचा मृत्यू झाला आहे. शुभांगी विनायक पटेल असं महिलेचे नाव आहे.. ती पतीसोबत ट्रेकिंगला गेली होती.

याबाबत मिळालेली माहिती अशी की, शुभांगी पटेल आणि विनायक यांचे वीस दिवसापूर्वी लग्न झाले होते. लग्नानंतर दोघे लोणावळा येथे हनिमून साठी 28 डिसेंबर रोजी गेले होते. त्या ठिकाणाहून ते दुपारी 2 च्या सुमारास माची प्रबळ येथे ट्रेकिंगसाठी गेले. यावेळी शुभांगी सेल्फी काढत असताना तिचा पाय घसरला आणि ती वरून खाली पडली. हा सर्व प्रकार विनायक याच्या डोळ्यादेखत घडला.

शुभांगी अंदाजे दीड ते दोन हजार फूट खाली कोसळली असल्याचे प्रत्यक्षदर्शीनी सांगितले. या महिलेला पनवेल तालुका पोलीस ठाण्याचे वरिष्ठ पोलीस निरीक्षक अनिल पाटील आणि त्यांची शेडुंग चौकीचे कार्यरत पोलीस घटनास्थळी गेले. पोलिसांच्या,स्थानिकांच्या आणि निसर्ग मित्र यांच्या मदतीने या महिलेला बाहेर काढण्यात आले. यावेळी फायर ब्रिगेडला पाचारण करण्यात आले होते. तिला रुग्णालयात दाखल केले असता डॉक्टरांनी रात्री आठच्या सुमारास मृत घोषित केले.