लग्नाच्या वाढदिवसादिवशी कुख्यात गुंड शरद मोहोळवर झाडल्या गोळ्या ; उपचारादरम्यान मृत्यू

पुणे । पुण्यातील कोथरूड परिसरात भरदिवसा गोळीबार झाला आहे. कुख्यात गुंड शरद मोहोळ याच्यावर अज्ञात हल्लेखोरांनी गोळीबार केला. गोळीबाराचे कारण अद्याप स्पष्ट झाले नाही. परंतु गँगवार प्रकरणातून हा गोळीबार झाल्याची शक्यता आहे. हल्ल्यात जखमी झालेल्या शरद मोहोळ याचा रुग्णालयात उपचार सुरु असताना मृत्यू झाला. शरद मोहोळ याचा आज लग्नाचा वाढदिवस आहे. त्याच दिवशी त्याचा मृत्यू झाला.

घटनेची माहिती मिळताच पुणे पोलिसांचा मोठा फौजफाटा घटनास्थळी दाखल झाला. पोलिसांनी घटनास्थळावरील सीसीटीव्ही फुटेज ताब्यात घेतले आहेत. त्यावरून आरोपींची ओळख पटवून आरोपींचा माग काढण्याचे काम पोलिसांनी सुरु केले आहे.

कोण होता शरद मोहोळ
शरद मोहोळ हा पुणे येथील कुख्यात गुंड होता. मुळशी तालुक्यातील एका सर्वसामान्य कुटुंबात तो वाढला होता. गुंड संदीप मोहोळ याचा ड्रायव्हर म्हणून त्याने गुन्हेगारी क्षेत्रात पदार्पण केले होते. संदीप मोहोळ याची हत्या झाली. त्यानंतर शरद याने स्वतःची गुन्हेगारी टोळी बनवून गुन्हे करण्यास सुरुवात केली. त्याच्यावर हत्या, हत्येचा प्रयत्न, खंडणी, अपहरण यांसारखे अनेक गुन्हे दाखल आहेत. टोळीयुद्धातून त्याने साथीदारांसोबत गणेश मारणे टोळीतील पिंटू मारणे याचा खून केला होता. त्यात त्याला अटक झाली होती. त्या खटल्यात त्याला जामीन मिळाला असता त्याने लवासा प्रकरणातील दासवे येथील सरपंच शंकर धींडले यांचे अपहरण केले होते. त्या गुन्ह्यात देखील त्याला पुन्हा अटक झाली होती.

एका गुन्ह्यात येरवडा कारागृहात असताना त्याने कातील सिद्दिकी याचा खून केला होता. कातील सिद्धिकी हा दहशतवादाच्या आरोपावरून येरवडा कारागृहात होता. त्याच्यासोबत किरकोळ कारणावरून वाद झाल्याने शरद मोहोळ याने त्याचा खून केला होता. सिद्दिकी खून खटल्यात पुराव्याअभावी त्याची निर्दोष सुटका झाली होती. सन 2022 मध्ये त्याला पुणे पोलिसांनी सहा महिन्यांसाठी तडीपार देखील केले होते.
राजकारणात सक्रीय
मागील काही महिन्यांपासून शरद मोहोळ सामाजिक कामांमध्ये सक्रीय सहभाग घेऊ लागला होता. तो त्याच्या मूळ गावचा उपसरपंच देखील बनला होता. त्याच्या पत्नीने भाजप मध्ये प्रवेश केला होता. पत्नीच्या माध्यमातून तो राजकारणात देखील सक्रीय होऊ लागला होता. असे असताना त्याचा गुन्हेगारी क्षेत्रातील वावर कुठेही कमी झाला नसल्याचे आजच्या घटनेवरून दिसून येत आहे.

लग्नाच्या वाढदिवसाच्या दिवशीच झाली हत्या
शरद मोहोळ याच्या लग्नाचा शुक्रवारी वाढदिवस होता. तो घरी असताना काही हल्लेखोर त्याच्या गल्लीत दबा धरून बसले होते. घरातून बाहेर येताच हल्लेखोरांनी त्याच्यावर गोळ्या झाडल्या. लग्नाच्या वाढदिवसाच्या दिवशी हा प्रकार घडला आहे.