नागपूर । कचऱ्याच्या डम्परने बहिण-भावाला चिरडल्याची धक्कादायक घटना नागपूरच्या वाठोडा पोलीस स्टेशन अंतर्गत घडली. अंजली ननेलाल सैनी (वय २०) आणि सुमित ननेलाल सैनी (वय १५) दोघे. रा. अंबेनगर बिडगाव अशी मृतकांची नावे असून या घटनेनंतर संतप्त जमावाने डम्पर पेटवला. तसंच बिडगाव चौकातही काही गाड्यांच्या काचा फोडल्या. सध्या या ठिकाणी मोठा पोलीस बंदोबस्त तैनात करण्यात आला आहे. दरम्यान, पोलिसांनी मृतदेहांचा पंचनामा करून मृतदेह शवविच्छेदनासाठी मेडिकलमध्ये पाठविले आहेत.
वाठोडा पोलिस ठाण्याच्या हद्दीत भांडेवाडी डम्पींग यार्ड आहे. या परिसरात कचरा उचलणाऱ्या टिप्परची सतत ये-जा सुरु असते. दरम्यान बिडगाव चौकात दुचाकीवरून जात असलेल्या अंजली आणि सुमित यांना कचरा उचलणाऱ्या भरधाव टिप्परने चिरडले. यामुळे घटनास्थळी नागरिकांची मोठी गर्दी झाली. संतप्त जमावाने टिप्परला आग लावली. घटनेची माहिती मिळताच वाठोडा पोलिसांचा ताफा घटनास्थळी पोहचला.
टिप्परला लागलेली आग विझविण्यासाठी अग्नीशमन दलाच्या वाहनाला पाचारण करण्यात आले. परंतु संतप्त नागरिकांनी अग्नीशमन दलाच्या वाहनावरही दगडफेक करून त्या वाहनाच्या काचा फोडल्या. त्यानंतर गुन्हे शाखेचे उपायुक्त मुमक्का सदर्शन, झोन चारचे उपायुक्त विजयकांत सागर आणि वरिष्ठ पोलिस अधिकारी घटनास्थळी पोहोचले. जमाव संतप्त होत असल्याचे पाहून राज्य राखीव दलाच्या जवानांना पाचारण करण्यात आले. दरम्यान पोलिसांनी पंचनामा करून दोन्ही मृतदेह शवविच्छेदनासाठी मेडिकलला रवाना केले.
