सावधान! केरळमध्ये निपाह व्हायरसचा अलर्ट जारी; व्हायरस किती धोकादायक?

केरळ । केरळमध्ये कोझिकोड जिल्ह्यात तापामुळे दोन जणांचा मृत्यू झाला असून दोघांचा मृत्यू निपाह व्हायरसमुळे झाल्याचा संशय आहे. केरळमध्ये निपाह व्हायरस आढळून आल्याने देशाची चिंता वाढली आहे. दरम्यान, यानंतर केरळच्या आरोग्य विभागाने कोझिकोड जिल्ह्यात निपाह व्हायरसशी संबंधित अलर्ट जारी केला आहे.

आरोग्य विभागाने सोमवारी रात्री परिपत्रक जारी करुन म्हटलं की, “राज्याच्या आरोग्य मंत्री वीणा जॉर्ज यांनी उच्चस्तरिय बैठक घेऊन परिस्थितीचा आढावा घेतला. तापानंतर दोन जणांना अनैसर्गिक मृत्यू झाल्याची माहिती एका खासगी रुग्णालयातून मिळाली. त्यांचा मृत्यू निपाह व्हायरसमुळे झाला असावा, अशी शंका आहे. निपाह व्हायरसच्या संशयामुळे एका मृताच्या नातेवाईकाला डॉक्टरांच्या देखरेखीखाली ठेवलं आहे.”

दरम्यान, कोझिकोड जिल्ह्यात 2018 आणि 2021 मध्येही निपाह व्हायरसमुळे मृत्यू झाला होता. निपाह व्हायरसचा पहिला रुग्ण 19 मे 2018 रोजी कोझिकोडमध्ये आढळला होता. त्यावेळी एकूण 23 रुग्ण आढळले होते. त्यावेळी 17 जणांचा मृत्यू झाला होता.

निपाह व्हायरस कसा पसरतो?
जागतिक आरोग्य संघटना अर्थात डब्लूएचओच्या माहितीनुसार, निपाह हा नवीन व्हायरस आहे. हा व्हायरस प्राण्यांद्वारे मनुष्यांमध्ये पसरतो. तसंच दूषित जेवणाच्या माध्यमातून हा व्हायरस एका व्यक्तीमधून दुसऱ्या व्यक्तीमध्ये त्याचा संसर्ग होतो. हा व्हायरस सर्वात आधी 1998 मध्ये मलेशियाच्या कम्पंग सुंगाई निपाहमध्ये आढळला होता. त्यामुळेच या व्हायरसचं नाव निपाह असं आहे. यानंतर सिंगापूर आणि बांगलादेशमध्येही या व्हायरसचा संसर्ग झालेले रुग्ण आढळले होते. हा व्हायरस वटवाघूळ आणि डुक्करांद्वारे मनुष्यामध्ये परसतो.

लक्षणे काय आहेत?
जर एखाद्या व्यक्तीला निपाह व्हायरसची लागण झाली असेल तर त्याला ताप, डोकेदुखी, श्वास घेण्यास त्रास, घशात खवखव, न्युमोनिया यांसारखी लक्षणे दिसातात. एखाद्याची प्रकृती गंभीर असेल तर त्याला एन्सेफलायटीस (मेंदूला सूज येणे) होऊ शकतो आणि 24 ते 48 तासांच्या आत कोमामध्ये जाऊ शकतो. निपाह व्हायरसची लक्षणे 5 ते 14 दिवसांच्या आत दिसतात. पण काही प्रकरणात लक्षणे दिसण्यासाठी 45 दिवसांचा काळही लागू शकतो. पण हे अतिशय धोकादायक आहे, कारण संबंधित व्यक्तीला व्हायरसची लागण झाल्याचं समजणार नाही आणि तोपर्यंत हा व्हायरसचा संसर्ग इतर लोकांमध्येही पसरु शकतो. तर काहींना या व्हायरसची लागण होऊनही त्याची लक्षणे दिसून येत नाहीत.