बुलढाणा । महाराष्ट्र प्रदेश काँग्रेस कमिटीचे उपाध्यक्ष कैलास फाटे यांच्या कारला बुलढाणा जिल्ह्यातील खामगावजवळ मुंबई-नागपूर राष्ट्रीय महामार्गावर भीषण अपघात झाला. भरधाव ट्रकने त्यांच्या कारला जोरदार धडक दिल्याने कारचा अक्षरशः चक्काचूर झाला. या अपघातात कैलास फाटे आणि कारचालक किरकोळ जखमी झाल्याची माहिती आहे. सुदैवाने या घटनेत कोणतीही जीवितहानी झाली नाही.पण काँग्रेसने हा घातपात असल्याचा संशय व्यक्त केला.
मिळालेल्या माहितीनुसार, कैलास फाटे हे मुंबई-नागपूर राष्ट्रीय महामार्गावरून कारने प्रवास करत होते. त्यांची कार खामगावजवळ आली असताना भरधाव ट्रकने कारला जोरदार धडक दिली. धडक इतकी भीषण होती की कारचे मोठ्या प्रमाणात नुकसान झाले. अपघातानंतर परिसरात एकच खळबळ उडाली.
या घटनेत कैलास फाटे यांना किरकोळ दुखापत झाली असून ते सुरक्षित असल्याची माहिती समोर आली आहे. कारचालकालाही किरकोळ दुखापत झाल्याचे सांगण्यात येत आहे. कारची अवस्था पाहता अपघाताची तीव्रता लक्षात येते.या अपघातानंतर बुलढाणा जिल्ह्यातील काँग्रेस पदाधिकाऱ्यांकडून घातपाताची शक्यता व्यक्त करण्यात आली आहे. हा केवळ अपघात होता की त्यामागे अन्य काही कारण आहे, याबाबत चर्चा सुरू झाली आहे. मात्र, हा घातपात असल्याचे अद्याप सिद्ध झालेले नाही. या प्रकरणात अधिकृत तपासातूनच वस्तुस्थिती स्पष्ट होऊ शकेल.
कैलास फाटे हे महाराष्ट्र प्रदेश काँग्रेस कमिटीचे राज्य उपाध्यक्ष असून, राज्यात पक्षाची संघटनात्मक बांधणी करण्याच्या कामात सक्रिय आहेत. अशा वेळी त्यांच्या कारला महामार्गावर झालेल्या भीषण अपघातामुळे विदर्भातील राजकीय वर्तुळात चर्चेला सुरुवात झाली आहे.
या अपघातात कारचे मोठे नुकसान झाले असले, तरी कैलास फाटे सुरक्षित असल्याने दिलासा व्यक्त केला जात आहे. दरम्यान, घातपाताच्या संशयाच्या पार्श्वभूमीवर या घटनेबाबत पुढे काय माहिती समोर येते, याकडे लक्ष लागले आहे.
Discussion about this post