दिवाळीसाठी मुंबईतून सुटणार २४ विशेष रेल्वे गाड्या, भुसावळसह या स्थानकांवर थांबे?

दसरा, दिवाळी आणि छठ पूजेच्या सण-उत्सवांच्या काळात रेल्वे गाड्यांमधील होणारी गर्दी लक्षात घेता मध्य रेल्वेने प्रवाशांसाठी एक मोठी खूशखबर दिली आहे. मुंबईतील लोकमान्य टिळक टर्मिनस (LTT) ते अयोध्या कॅंट दरम्यान २४ साप्ताहिक सण-उत्सव विशेष गाड्या चालवण्याचा निर्णय घेण्यात आला आहे. विशेष म्हणजे या सर्व गाड्या अत्याधुनिक आणि आरामदायी ‘अमृत भारत’ रेकद्वारे चालवल्या जाणार आहेत. या गाडीला भुसावळ स्थानकावर थांबा देण्यात आला असून यामुळे खान्देशातील प्रवाशांना मुंबई आणि अयोध्याच्या प्रवासासाठी मोठी सोय उपलब्ध झाली है.

गाड्यांचे वेळापत्रक आणि दिवस

एलटीटी ते अयोध्या कॅंट (गाडी क्र. 01045): ही गाडी १९ ऑक्टोबर २०२६ ते २७ नोव्हेंबर २०२६ दरम्यान दर सोमवारी आणि शुक्रवारी लोकमान्य टिळक टर्मिनस येथून सकाळी ०७:३५ वाजता सुटेल आणि दुसऱ्या दिवशी सकाळी १०:१५ वाजता अयोध्या कॅंट येथे पोहोचेल (एकूण १२ फेऱ्या).

अयोध्या कॅंट ते एलटीटी (गाडी क्र. 01046):

परतीच्या प्रवासासाठी ही गाडी २० ऑक्टोबर २०२६ ते २८ नोव्हेंबर २०२६ दरम्यान दर मंगळवारी आणि शनिवारी अयोध्या कॅंट येथून दुपारी १३:५० (१:५०) वाजता सुटेल आणि दुसऱ्या दिवशी सायंकाळी १७:१५ (५:१५) वाजता लोकमान्य टिळक टर्मिनस येथे पोहोचेल (एकूण १२ फेऱ्या).

प्रमुख थांबे:

या गाडीला कल्याण, इगतपुरी, नाशिक रोड, मनमाड, भुसावळ, खंडवा, इटारसी, जबलपूर, कटनी, सतना, माणिकपूर, प्रयागराज जंक्शन, प्रतापगड आणि सुलतानपूर या महत्त्वाच्या स्थानकांवर थांबा देण्यात आला आहे.

अमृत भारत रेक असलेल्या या ट्रेनमध्ये ८ शयनयान (Sleeper), ११ सामान्य द्वितीय श्रेणी (General Unreserved), १ पॅन्ट्री कार आणि २ गार्ड्स ब्रेक व्हॅन असे डबे असणार आहेत.

आरक्षण आणि तिकीट बुकिंग:

गाडी क्रमांक 01045 चे बुकिंग सर्व संगणकीकृत आरक्षण केंद्रांवर आणि IRCTC च्या अधिकृत वेबसाईटवर (www.irctc.co.in) उपलब्ध आहे. तसेच, अनारक्षित डब्यांसाठी प्रवासी UTS ॲप किंवा ‘रेलवन’ (RailOne) ॲपद्वारे तिकिटे बुक करू शकतात.