राजकीय वर्तुळातून मोठी बातमी समोर येत आहे. भंडारा जिल्ह्यातील मोहाडी शहरात राष्ट्रवादी काँग्रेसच्या शरदचंद्र पवार गटाला मोठा राजकीय धक्का बसला आहे. पक्षातील तीन नगरसेवकांसह शेकडो कार्यकर्त्यांनी राष्ट्रवादी काँग्रेसच्या अजित पवार गटात प्रवेश केला आहे. गोंदिया येथे खासदार प्रफुल्ल पटेल यांच्या उपस्थितीत हा पक्षप्रवेश सोहळा पार पडला. या घडामोडीमुळे मोहाडीच्या स्थानिक राजकारणात चर्चांना उधाण आले आहे.
प्रफुल्ल पटेल यांच्या उपस्थितीत पक्षप्रवेश
गोंदिया येथे आयोजित कार्यक्रमात खासदार प्रफुल्ल पटेल यांनी नव्याने पक्षात प्रवेश केलेल्या नगरसेवक आणि कार्यकर्त्यांचे स्वागत केले. यावेळी त्यांनी पक्ष संघटना मजबूत करण्यासाठी सर्वांनी एकजुटीने काम करण्याचे आवाहन केले. आपापसांतील मतभेद बाजूला ठेवून संघटनेच्या विस्तारासाठी योगदान द्यावे, असा संदेशही त्यांनी दिला.
तीन नगरसेवकांसह शेकडो कार्यकर्त्यांनी अजित पवार गटात प्रवेश केल्याने मोहाडी शहरातील राजकीय समीकरणांवर याचा परिणाम होण्याची शक्यता व्यक्त केली जात आहे. स्थानिक पातळीवर कार्यकर्त्यांची ताकद वाढवणे आणि पक्षाची ध्येयधोरणे जनतेपर्यंत पोहोचवणे, यावर आगामी काळात भर दिला जाणार आहे. या पक्षप्रवेशामुळे अजित पवार गटाला मोहाडीमध्ये संघटनात्मक बळ मिळाल्याचे मानले जात आहे. दरम्यान, या घडामोडीनंतर भंडारा जिल्ह्यातील राष्ट्रवादी काँग्रेसच्या राजकीय हालचालींकडे लक्ष लागले असून, आगामी काळात स्थानिक राजकारणात कोणती नवी समीकरणे तयार होतात, हे पाहणे महत्त्वाचे ठरणार आहे.
Discussion about this post