लहान मुलांच्या आरोग्याच्या सुरक्षिततेच्या दृष्टीने केंद्र सरकारने औषधांबाबत मोठा निर्णय घेतला आहे. ४ वर्षांखालील मुलांसाठी सर्दी-खोकल्याच्या उपचारात वापरल्या जाणाऱ्या काही औषधांच्या वापरावर कडक निर्बंध घालण्यात आले आहेत. क्लोरफेनिरामाइन मॅलेट आणि फिनाइलफ्राइन हायड्रोक्लोराइड हे घटक असलेल्या निश्चित-मात्रेच्या मिश्रणांबाबत सरकारने हा निर्णय घेतला आहे.
या औषधांच्या वापरामुळे लहान मुलांच्या आरोग्यावर संभाव्य गंभीर परिणाम होण्याची शक्यता लक्षात घेऊन तज्ज्ञ समिती आणि औषध तांत्रिक सल्लागार मंडळाच्या शिफारशींच्या आधारे सरकारने ही कारवाई केली आहे.केंद्र सरकारच्या आदेशानुसार, क्लोरफेनिरामाइन मॅलेट आणि फिनाइलफ्राइन हायड्रोक्लोराइड असलेल्या संबंधित औषधांवर ‘४ वर्षांखालील मुलांसाठी वापरू नये’ असा स्पष्ट इशारा देणे आवश्यक करण्यात आले आहे.हा इशारा केवळ औषधाच्या बाटलीवरच नव्हे, तर लेबल, पॅकेज इन्सर्ट आणि प्रचारात्मक साहित्यावरही ठळकपणे नमूद करणे औषध कंपन्यांसाठी बंधनकारक राहणार आहे.
तज्ज्ञांच्या शिफारशीनंतर निर्णय
सरकारने घेतलेला हा निर्णय तज्ज्ञ समिती तसेच औषध तांत्रिक सल्लागार मंडळाच्या शिफारशींवर आधारित आहे. संबंधित औषध मिश्रणांचा ४ वर्षांखालील मुलांमध्ये वापर केल्यास आरोग्याला धोका निर्माण होण्याची शक्यता असल्याचे तज्ज्ञांनी नमूद केले आहे. याच वयोगटातील मुलांसाठी तुलनेने सुरक्षित उपचार पर्याय उपलब्ध असल्याचेही सरकारकडून स्पष्ट करण्यात आले आहे.
यापूर्वीही देण्यात आला होता इशारा
केंद्र सरकारने यापूर्वी १५ एप्रिल २०२५ रोजी जारी केलेल्या अधिसूचनेत क्लोरफेनिरामाइन मॅलेट आणि फिनाइलफ्राइन हायड्रोक्लोराइड असलेल्या काही निश्चित-मात्रेच्या मिश्रणांवर वयासंदर्भातील इशारा लागू केला होता.आता सरकारने या तरतुदीची व्याप्ती वाढवत या दोन घटकांचा समावेश असलेल्या सर्व संबंधित फॉर्म्युलेशन्सबाबत कडक नियम लागू केले आहेत.
पालकांनी काय काळजी घ्यावी?
लहान मुलांना सर्दी किंवा खोकला झाल्यास स्वतःहून औषध देण्याऐवजी डॉक्टरांचा सल्ला घेणे महत्त्वाचे आहे. विशेषतः ४ वर्षांखालील मुलांना कोणतेही सर्दी-खोकल्याचे औषध देण्यापूर्वी त्यातील घटक आणि वयोमर्यादा तपासावी, असा सल्ला दिला जात आहे.
Discussion about this post