मुंबई : राष्ट्रवादी काँग्रेसमध्ये प्रदेशाध्यक्ष बदलण्याच्या चर्चांना सध्या उधाण आले आहे. सुनील तटकरे यांना प्रदेशाध्यक्षपदावरून हटवले जाणार असल्याच्या चर्चा सुरू असतानाच, अमळनेरचे अजितदादांच्या राष्ट्रवादीचे आमदार अनिल पाटील यांचे नाव संभाव्य प्रदेशाध्यक्ष म्हणून चर्चेत आल्याने राजकीय वर्तुळात खळबळ उडाली आहे. याच पार्श्वभूमीवर आमदार अनिल पाटील यांनी या चर्चांवर स्पष्ट भूमिका मांडली आहे.
प्रशांत किशोर आणि उपमुख्यमंत्री सुनेत्रा पवार तसेच पार्थ पवार यांच्यात तब्बल सहा तास बैठक झाल्याची चर्चा आहे. या बैठकीनंतर राष्ट्रवादी काँग्रेसच्या प्रदेशाध्यक्षपदाबाबत पक्षात चर्चा सुरू झाल्याचे बोलले जात आहे. प्रशांत किशोर यांनी सुनील तटकरे यांना प्रदेशाध्यक्षपदावरून हटवण्याचा सल्ला दिल्याचीही चर्चा राजकीय वर्तुळात रंगली आहे.मात्र या चर्चांवर अनिल पाटील यांनी प्रतिक्रिया देताना प्रदेशाध्यक्ष बदलाचा प्रशांत किशोर यांच्या सल्ल्याशी काहीही संबंध नसल्याचे म्हटले आहे.
‘प्रदेशाध्यक्ष कोणाच्या सल्ल्याने बदलला जात नाही’
अनिल पाटील म्हणाले की, प्रदेशाध्यक्ष कोणाच्या सल्ल्याने बदलला जात नाही. हा पक्षाचा अंतर्गत विषय असून प्रदेशाध्यक्ष बदलण्याची जबाबदारी राष्ट्रीय अध्यक्षांची आहे. प्रशांत किशोर यांनी सुनील तटकरे यांना हटवण्याच्या सूचना दिल्या असतील, असे आपल्याला अजिबात वाटत नसल्याचेही त्यांनी स्पष्ट केले.देशाध्यक्ष बदलण्याबाबत आपल्याला माध्यमांमधूनच माहिती मिळत असल्याचे सांगत अनिल पाटील यांनी आपल्या नावाची सुरू असलेली चर्चा फेटाळून लावली.
आपल्या नावाची प्रदेशाध्यक्षपदासाठी चर्चा होत असल्याबाबत बोलताना अनिल पाटील म्हणाले की, आपल्या सूत्रांच्या माहितीनुसार प्रदेशाध्यक्षपदाबाबत कुठेही चर्चा झालेली नाही. पक्षाचा कार्यकर्ता म्हणून काम करण्यामध्येच आपल्याला सर्वाधिक आनंद असून, पक्षाने भविष्यातही कार्यकर्ता म्हणून काम करण्याची संधी द्यावी, अशी इच्छा असल्याचे त्यांनी सांगितले. दरम्यान, राष्ट्रवादी काँग्रेसमध्ये सुनील तटकरे आणि प्रफुल्ल पटेल यांच्या भूमिकेबाबतही विविध चर्चा सुरू आहेत. त्यातच प्रदेशाध्यक्ष बदलाच्या चर्चांनी जोर धरल्याने आगामी काळात पक्षाच्या संघटनात्मक पातळीवर काही बदल होणार का, याकडे राजकीय वर्तुळाचे लक्ष लागले आहे.
Discussion about this post