रावेर | अमरावती ग्रामीण जिल्ह्यातील मोर्शी पोलीस ठाण्याच्या हद्दीत ट्रक चालकाची हत्या करून मृतदेह जाळल्याच्या खळबळजनक गुन्ह्यातील मुख्य आरोपीला रावेर पोलिसांनी अवघ्या काही तासांत जेरबंद केले आहे. जळगाव आणि अमरावती ग्रामीण पोलिसांच्या समन्वयातून करण्यात आलेल्या या कारवाईमुळे गंभीर गुन्ह्याचा छडा लावण्यात मोठे यश मिळाले आहे.
पोलिसांनी दिलेल्या माहितीनुसार, मोर्शी पोलीस ठाण्याच्या हद्दीत उभ्या असलेल्या ट्रकच्या केबिनमध्ये एका ट्रक चालकाचा जळालेला मृतदेह आढळून आला होता. पुरावे नष्ट करण्यासाठी तसेच मृत्यूचे खरे कारण लपविण्याच्या उद्देशाने ट्रकला आग लावण्यात आल्याचा संशय व्यक्त करण्यात आला होता. या प्रकरणी अमरावती ग्रामीण पोलिसांनी तपास सुरू केला असता आरोपी जळगाव जिल्ह्यातील रावेर येथे असल्याची माहिती मिळाली.
आज सकाळी ८.४८ वाजता अमरावती ग्रामीणचे पोलीस अधीक्षक यांनी जळगावचे पोलीस अधीक्षक यांच्याशी संपर्क साधून आरोपी रावेर रेल्वे स्थानक परिसरात असून पंजाबकडे पळून जाण्याच्या तयारीत असल्याची माहिती दिली. त्यानंतर पोलीस निरीक्षक संदीप पाटील यांच्या नेतृत्वाखाली रावेर पोलीस स्टेशनच्या पथकाने तातडीने शोधमोहीम राबवली.
पोलिसांकडे आरोपीचा केवळ एक अस्पष्ट फोटो उपलब्ध असतानाही पथकाने रेल्वे स्थानक परिसरात सापळा रचून संशयिताला शिताफीने ताब्यात घेतले. प्राथमिक चौकशीत आरोपीने आर्थिक कारणातून ट्रक चालकाचा गळा दाबून खून केल्याची तसेच पुरावे नष्ट करण्यासाठी मृतदेहासह ट्रकला आग लावल्याची कबुली दिल्याची माहिती समोर आली आहे.
अटक करण्यात आलेल्या आरोपीचे नाव मनप्रीतसिंह कश्मीरसिंह रंधावा (वय ४८), रा. महमद, गाव मंध्रवाला, ता. अजनाडा, जि. अमृतसर (पंजाब) असे आहे. आरोपीच्या ताब्यातून पांढऱ्या रंगाची आयशर ट्रक (क्रमांक PB-02-EW-4299) जप्त करण्यात आली आहे.
सध्या आरोपी रावेर पोलीस स्टेशनच्या ताब्यात असून त्याचा ताबा घेण्यासाठी अमरावती ग्रामीण पोलिसांचे पथक जळगावकडे रवाना झाले आहे. या प्रकरणाचा पुढील तपास मोर्शी पोलीस करीत आहेत.
Discussion about this post