मुंबई । राज्य सरकारने माजी उपमुख्यमंत्री तथा राष्ट्रवादी काँग्रेसचे दिवंगत नेते अजितदादा अनंतराव पवार यांच्या जयंतीबाबत महत्त्वाचा निर्णय घेतला आहे. २२ जुलै रोजी साजरी होणारी त्यांची जयंती यापुढे राज्यभर शासकीय स्तरावर साजरी करण्यात येणार आहे. यासंदर्भातील अधिकृत परिपत्रक सामान्य प्रशासन विभागाने जारी केले आहे.
परिपत्रकानुसार, २२ जुलै रोजी मंत्रालयासह राज्यातील सर्व शासकीय व निमशासकीय कार्यालयांमध्ये अजितदादा पवार यांच्या प्रतिमेला पुष्पहार अर्पण करून अभिवादन करण्यात येणार आहे. तसेच शाळा, महाविद्यालये आणि विविध शासकीय संस्थांमध्येही त्यांच्या कार्याचा गौरव करणारे कार्यक्रम आयोजित करण्याचे निर्देश देण्यात आले आहेत.
या निर्णयासाठी राष्ट्रवादी काँग्रेसचे ज्येष्ठ नेते तथा अन्न व नागरी पुरवठामंत्री छगन भुजबळ आणि वैद्यकीय शिक्षण मंत्री हसन मुश्रीफ यांनी मुख्यमंत्री देवेंद्र फडणवीस यांच्याकडे लेखी मागणी केली होती. त्यानंतर शासनाने तातडीने याबाबतचा निर्णय घेत परिपत्रक जारी केले.
राज्य शासनाने सन २०२६ मधील राष्ट्रपुरुष व थोर व्यक्तींच्या अधिकृत जयंती कार्यक्रमांच्या यादीत अजितदादा पवार यांच्या जयंतीचा समावेश केला आहे. त्यामुळे दरवर्षी २२ जुलै रोजी राज्यभर शासकीय स्तरावर त्यांच्या स्मृतींना अभिवादन करण्यात येणार आहे.
परिपत्रकानुसार, विभागीय आयुक्त, जिल्हाधिकारी आणि संबंधित यंत्रणांना कार्यक्रमाचे नियोजन व प्रभावी अंमलबजावणी करण्याचे निर्देश देण्यात आले आहेत. यामुळे राज्यातील सर्व शासकीय कार्यालये, शैक्षणिक संस्था आणि विविध विभागांमध्ये एकाच दिवशी जयंती कार्यक्रम पार पडणार आहेत.
राजकीय आणि प्रशासकीय क्षेत्रातील त्यांच्या योगदानाची दखल घेत राज्य सरकारने हा निर्णय घेतल्याचे सांगण्यात आले आहे. प्रशासनावरील पकड, विकासकामांवरील भर आणि लोकाभिमुख निर्णयांमुळे अजितदादा पवार यांनी महाराष्ट्राच्या राजकारणात वेगळी ओळख निर्माण केली होती. शासनाचा हा निर्णय त्यांच्या कार्याला वाहिलेली अधिकृत आदरांजली मानला जात आहे.
Discussion about this post