पुणे । राज्य माध्यमिक व उच्च माध्यमिक शिक्षण मंडळाच्या दहावी आणि बारावीच्या पुरवणी परीक्षेला बसलेल्या विद्यार्थ्यांसाठी महत्त्वाची बातमी आहे. दहावी आणि बारावी पुरवणी परीक्षेचा निकाल १५ जुलै (बुधवार) रोजी दुपारी १ वाजता ऑनलाइन जाहीर करण्यात येणार असून, राज्यभरातील हजारो विद्यार्थी आणि पालकांचे लक्ष या निकालाकडे लागले आहे.
फेब्रुवारी-मार्च २०२६ मध्ये झालेल्या राज्य मंडळाच्या मुख्य परीक्षेत अनुत्तीर्ण झालेल्या विद्यार्थ्यांसाठी जून-जुलै महिन्यात पुरवणी परीक्षा घेण्यात आली होती. या परीक्षेच्या उत्तरपत्रिका वेगाने तपासून नियोजित वेळेत निकाल जाहीर करण्यासाठी मंडळाने विशेष प्रयत्न केले आहेत.
राज्यातील पुणे, मुंबई, नागपूर, छत्रपती संभाजीनगर, नाशिक, कोल्हापूर, अमरावती, लातूर आणि कोकण या नऊ विभागीय मंडळांच्या कार्यक्षेत्रातील विद्यार्थ्यांनी या परीक्षेत सहभाग घेतला होता.
दहावीची पुरवणी परीक्षा १६ जून ते ३० जूनदरम्यान, तर बारावीची पुरवणी परीक्षा १६ जून ते ८ जुलैदरम्यान पार पडली होती.
निकाल जाहीर झाल्यानंतर विद्यार्थ्यांना मंडळाच्या अधिकृत संकेतस्थळावर सीट नंबर आणि आवश्यक माहिती भरून निकाल पाहता येणार आहे. ऑनलाइन निकालाची प्रत डाउनलोड करून ठेवण्याचे आवाहन मंडळाने केले असून, अधिकृत गुणपत्रिका आणि इतर कागदपत्रे संबंधित शाळा व महाविद्यालयांमार्फत पुढील काही दिवसांत उपलब्ध करून दिली जाणार आहेत.
Discussion about this post