अयोध्या । अयोध्येतील प्रभू श्रीराम मंदिराच्या दानपेटीतील चोरी प्रकरणात आता दिवसेंदिवस अत्यंत धक्कादायक खुलासे समोर येत आहेत. दानपेटीतून चोरलेली कोट्यवधींची रक्कम थेट शेअर बाजारात गुंतवण्यात आल्याची खळबळजनक माहिती पोलीस तपासात उघड झाली आहे. या आंतरराष्ट्रीय स्तरावर चर्चेत असलेल्या चोरीचा छडा लावण्यासाठी तपास यंत्रणा आता पैशांच्या मूळ स्रोताचा शोध घेत असून, आरोपींच्या नातेवाईकांच्या बँक खात्यांपासून ते ट्रेडिंग रेकॉर्ड्सपर्यंत सर्व बाबींची कसून चौकशी केली जात आहे.
मिळालेल्या माहितीनुसार, या प्रकरणाचा तपास करत असलेल्या पोलिसांनी आतापर्यंत विविध बँकांमधील तब्बल ३० खाती गोठवली (Freeze) आहेत. तपास यंत्रणांच्या संशयानुसार, आरोपींनी चोरीची रक्कम थेट स्वतःच्या खात्यात किंवा गुंतवणुकीसाठी वापरली नाही. पकडले जाऊ नये म्हणून त्यांनी प्रथम हा पैसा आपले नातेवाईक आणि जवळच्या व्यक्तींच्या बँक खात्यांमध्ये जमा केला. त्यानंतर, या विविध खात्यांमधून गुंतागुंतीचे व्यवहार करून हा पैसा शेअर बाजार आणि इतर गुंतवणूक पर्यायांकडे वळवण्यात आला. या हुशारीमुळे पैशांचा मूळ मालक कोण आहे, हे लपवण्याचा प्रयत्न आरोपींनी केला होता.
तपासात आणखी एक धक्कादायक आणि महत्त्वाची बाब समोर आली आहे. आरोपींनी एकाच वेळी मोठी रक्कम चोरली नव्हती. गेल्या अनेक महिन्यांपासून दान मोजणी प्रक्रियेतील त्रुटींचा आणि सुरक्षेतील त्रुटींचा फायदा घेत आरोपी टप्प्याटप्प्याने छोटी-छोटी रक्कम बाजूला काढत होते. प्रत्येक वेळी कमी रक्कम गायब होत असल्यामुळे हा प्रकार मंदिर प्रशासनाच्या बराच काळ लक्षात आला नाही.
असा झाला पर्दाफाश
गेल्या काही दिवसांत दान मोजणीदरम्यान काही कर्मचाऱ्यांच्या हालचाली संशयास्पद वाटल्याने मंदिर प्रशासन सतर्क झाले होते. प्रशासनाने तात्काळ अंतर्गत चौकशी करत सुरक्षा विभागाला पाचारण केले. त्यानंतर मंदिरातील अतिउच्च क्षमतेच्या सीसीटीव्ही फुटेजची सखोल तपासणी करण्यात आली. या फुटेजमध्ये कर्मचारी दानपेटीतील रक्कम लंपास करताना रंगेहात कॅमेऱ्यात कैद झाले.
या भक्कम पुराव्यांच्या आधारे पोलिसांनी गुन्हा दाखल करत कारवाईचा बडगा उगारला आहे. या रॅकेटमध्ये आणखी काही बड्या व्यक्तींचा किंवा शेअर बाजारातील दलालांचा हात आहे का, याचा शोध पोलिसांचे विशेष पथक घेत आहे. या कारवाईमुळे राम मंदिर परिसरात आणि भाविकांमध्ये एकच खळबळ उडाली आहे.
Discussion about this post