जळगाव । जळगाव जिल्ह्यात अपघाताच्या घटना दिवसेंदिवस वाढताना दिसत असून अशातच लग्नसमारंभ आटोपून कुटुंबासह मूळ गावी परतत असताना झालेल्या भीषण कार अपघातात गोदावरी कॉलेज ऑफ नर्सिंगचे प्रशासकीय अधिकारी प्रवीण प्रल्हाद कोल्हे (वय ४८, मूळ रा. रोझोदा, ता. रावेर) यांचा उपचारादरम्यान दुर्दैवी मृत्यू झाला आहे. या धक्कादायक घटनेमुळे जळगाव शहर आणि रावेर तालुक्यात प्रचंड हळहळ व्यक्त करण्यात येत आहे.
मिळालेल्या माहितीनुसार, भुसावळ येथील लग्नसोहळा आटोपून कोल्हे हे आपली पत्नी, मुलगी, आई आणि वहिनीसह कारने रात्री उशिरा मूळ गावी रोझोदाकडे निघाले होते. १४ मे रोजी मध्यरात्री १:३० वाजेच्या सुमारास आमोदा गावाजवळील पुलाजवळ कारवरील नियंत्रण सुटल्याने कार थेट रस्त्याशेजारील झाडावर प्रचंड वेगाने आदळली.
या भीषण अपघातात प्रवीण कोल्हे यांच्या डोक्याला गंभीर दुखापत झाली होती, तर कारमधील इतर महिला किरकोळ जखमी झाल्या. स्थानिक नागरिकांच्या मदतीने त्यांना तातडीने रुग्णालयात दाखल करण्यात आले होते. मात्र, गेली तीन दिवस मृत्यूशी झुंज दिल्यानंतर आज, रविवारी (१७ मे) पहाटे उपचार सुरू असताना त्यांची प्राणज्योत मालवली.
सन २००३ पासून गोदावरी नर्सिंग कॉलेजमध्ये कार्यरत असलेले प्रवीण कोल्हे हे आपल्या शांत आणि मनमिळावू स्वभावासाठी परिचित होते. त्यांच्या या अकाली निधनामुळे शैक्षणिक व सामाजिक क्षेत्रात मोठी पोकळी निर्माण झाली असून सर्वत्र हळहळ व्यक्त होत आहे.
Discussion about this post