जळगाव । पोलीस मुख्यालय जळगाव अंतर्गत कार्यरत असलेल्या दोन पोलीस अंमलदारांना कर्तव्यात गंभीर निष्काळजीपणा आणि शिस्तभंग केल्याप्रकरणी तात्काळ निलंबित करण्यात आले आहे. संवेदनशील ठिकाणी ड्युटीवरून अनुपस्थित राहणे आणि शस्त्रास्त्रांच्या सुरक्षेबाबत हलगर्जीपणा केल्याने पोलीस विभागात मोठी खळबळ उडाली आहे.
माहितीनुसार, ८ मे २०२६ रोजी रात्री सुमारे ९.२० वाजता राखीव पोलीस निरीक्षकांनी पोलीस अधीक्षक बंगल्यावरील गार्ड ड्युटीची अचानक तपासणी केली. यावेळी ड्युटीवर नियुक्त असलेले सफौ/१३७८ संभाजी निबाजी पाटील आणि पोना/३९३ प्रदीप भगतसिंग राजपूत हे दोघेही आपल्या कर्तव्याच्या ठिकाणी अनुपस्थित आढळून आले.
तपासणीदरम्यान गार्ड रूममध्ये ठेवलेल्या तीन एसएलआर रायफल्सपैकी एक रायफल कोणताही दारूगोळा नसताना तसेच आवश्यक सुरक्षा न ठेवता बेवारस अवस्थेत आढळली. ही बाब अत्यंत गंभीर मानण्यात आली असून वरिष्ठ अधिकाऱ्यांनी तातडीने याची दखल घेतली.
पोलीस प्रशासनाने या प्रकाराला महाराष्ट्र नागरी सेवा (वर्तणूक) नियम १९७९ मधील नियम ३ चे उल्लंघन मानले आहे. त्यानुसार जळगावचे पोलीस अधीक्षक यांनी संबंधित दोन्ही अंमलदारांना तात्काळ निलंबित करण्याचे आदेश जारी केले आहेत.
निलंबन कालावधीत दोन्ही कर्मचाऱ्यांचे मुख्यालय पोलीस मुख्यालय जळगाव येथेच राहणार असून पूर्वपरवानगीशिवाय मुख्यालय सोडण्यास मनाई करण्यात आली आहे. या कारवाईमुळे पोलीस दलात शिस्त आणि जबाबदारीबाबत स्पष्ट संदेश गेल्याची चर्चा सुरू आहे.
Discussion about this post